2016-cı il aprelin 5-dən 7-nə kimi İstanbulda 19-cu Avrasiya İqtisadiyyat Sammiti keçirildi. Həmin tədbirdə Xəzər Universiteti İctimai əlaqələr və media üzrə direktoru Əlövsət Əmirbəyli nümayəndə kimi ştirak edirdi. Tədbirdə dünyanın 44 ölkəsindən 450 nümayəndə olmaqla, müxtəlif ölkələrdən prezidentlər, baş nazirlər, nazirlər və millət vəkilləri iştirak edirdilər. Tədbirin ilk günü Ə.Əmirbəyli Türkiyə Cümhuriyyəti Baş nazirinin müavini Tuğrul Türkeş ilə görüşdü. O, T.Türkeşə Xəzər Universiteti haqqında geniş məlumat verdi, onunla müxtəlif məsələlərin müzakirəsini həyata keçirdi.

Zirvə Toplantısının 2-ci günü müxtəlif ölkələrin prezidentlərinin dünyada yaranmış gərgin vəziyyətlə bağlı siyasi mesajları oldu. Azərbaycan Respublikası adından Diasporalarla İş üzrə Dövlət Komitəsinin sədri Nazim İbrahimov çıxış etdi. Türkiyə Cümhuriyyəti Baş nazirinin müavinləri Mehmet Şimşek və Tuğrul Türkeş Türkiyə dövləti adından çıxış etdilər. Sammitdə çıxış edən dövlət rəsmləri Ermənistanın Azərbaycana olan təcavüzünü qəti şəkildə pislədilər və Azərbaycan torpaqlarının bütövlüyü uğrunda həyatını qurban vermiş şəhidlərin ruhuna fatihə oxudular. Həmin gün zirvənin fəxri qonağı Türkiyə Cümhuriyyətinin keçmiş prezidenti Abdullah Gül də tədbirdə iştirak etdi və bir sıra siyasi mesajlar verdi – hər zaman Azərbaycanın yanında olduqlarını bildirdilər.

Zirvə toplantısının 3-cü günü əsas mövzu terror məsələsi idi. Bu məsələnin müzakirəsində bütün Qafqazın şeyxi Allahşükür Paşazadə, Ekümenik patriki Patrik Bartholomeos, İordaniyanın Baş naziri Taher Eh-Maşri, Belçikanın Dövlət naziri Emir Kır, Belçikanın millət vəkili Ozlem Özen, Hollandiya senatoru Rene Van Der Linden, Avstriya Müdafiə naziri Werner Fasslorbend, Türkiyə Cümhuriyyəti Avropa Birliyi və sabiq dövlət naziri Eğemen Bağış, Bosniya və Herseqovina Federasiyası sədrinin müavini Melika Mahmutbeqoviç və Bosniya-Hersek Federasiya Başqanı Marinko Covana, İstanbul valisi Vasip Şahin və digər rəsmlər çıxış etdilər. Onlar dünyanın baş bəlası olan terrorun tezliklə aradan qaldırılmasını tələb etdilər. Zirvə toplantısında Azərbaycan Parlamentinin sədr müavini Valeh Ələsgərov, Energetika naziri Natiq Əliyev, Diasporalarla İş üzrə Dövlət Komitəsinin sədri Nazim İbrahimov, bütün Qafqazın şeyxi şeyxülislam Allahşükür Paşazadə, millət vəkili Nizami Cəfərov, Azərbaycanın Türkmənistandakı Fövqəladə və Səlahiyyətli səfiri Həsən Zeynalov iştirak edirdilər.

Zirvə toplantısının sonunda tədbirin təşkilatçıları adından Mərmərə Qrupu Başqanı Dr.Akkan Suver tədbirdə iştirak edən dövlət başçılarına və nümayəndələrə dərin təşəkkürünü bildirdi.