Bakı Şəhər Baş Polis İdarəsinin Yetkinlik Yaşına Çatmayanlarla Profilaktiki İşin Təşkili Bölməsinin (YYÇPİTB) təşkilatçılığı ilə 2026-ci il fevralın 11-də Bakının Xətai rayonunda 27 nömrəli tam orta məktəbdə “Narkomaniyaya yox deyək!” mövzusunda maarifləndirici seminar keçirilib.

Tədbirdə Xəzər Universitetinin Psixologiya departamentinin əməkdaşı, Xəzər Psixoloji Xidmət Mərkəzinin psixoloqu Mirsadiq Muxtarov çıxış edərək, maddə asılılığının cəmiyyət üçün yaratdığı psixoloji və sosial problemlərə toxunub. O, bu problemin erkən mərhələdə müəyyən edilməsinin xüsusi əhəmiyyət daşıdığını vurğulayıb, profilaktikanın gücləndirilməsi və maarifləndirmə fəaliyyətlərinin genişləndirilməsinin vacibliyini qeyd edib. Psixoloq, eyni zamanda, ailə və təhsil mühitinin asılılıq hallarının qarşısının alınmasında əsas rol oynadığını bildirib, sağlam həyat tərzinin təşviqinin gənclərin formalaşması və gələcək inkişafı üçün mühüm amil olduğunu diqqətə çatdırıb.

Tədbirdə Bakı şəhər Baş Polis İdarəsinin Yetkinlik Yaşına Çatmayanlarla Profilaktiki İşin Təşkili Bölməsinin rəisi, polis polkovniki İbrahim İsmayılov, həmin bölmənin inspektorları polis mayoru Afaq Əliyeva və polis baş leytenantı Aysel Hacıyeva, Xətai Rayon Polis İdarəsinin YYÇPİTB-nin inspektoru polis kapitanı Aygün Uluxanova, Bakı Narkoloji Mərkəzin psixoloqu Günay Əsgərova iştirak etmişdir.

Tədbir şagird və müəllim heyətinin fəal iştirakı ilə interaktiv şəkildə keçirilmiş, mövzu ətrafında geniş fikir mübadiləsi aparılmış və suallar cavablandırılmışdır.