2025-ci il fevralın 5-də Xəzər Universitetində Kitabxana-İnformasiya Mərkəzinin təşkilatçılığı ilə  “EBSCOhost platformasında EBSCO AI alətləri ilə axtarışın təkmilləşdirilməsi” mövzusunda onlayn seminar keçirilib.

Seminar EBSCO şirkətinin nümayəndəsi Iryna Serzhan tərəfindən aparılıb. Tədbirin məqsədi Xəzər Universitetində mövcud olan EBSCOhost platforması vasitəsilə elmi resurslardan daha səmərəli istifadə imkanlarını iştirakçılara təqdim etmək olub.

Onlayn seminar zamanı EBSCO-nun süni intellekt əsaslı axtarış alətləri, eləcə də akademik tədqiqat prosesini asanlaşdıran funksiyalar əyani şəkildə nümayiş etdirilib, iştirakçıların sualları cavablandırılıb.

Tədbir çərçivəsində aşağıdakı mövzular üzrə ətraflı məlumat verilib: Xəzər Universitetində mövcud olan jurnal, kitab və dissertasiyaların tam mətnlərinə çıxış imkanları; Daha dəqiq nəticələr əldə etmək üçün axtarış sorğularının düzgün formalaşdırılması; Axtarış prosesini təkmilləşdirən süni intellekt alətlərindən istifadə; Natural Language Search, Generate AI Insights, More Like This funksiyalarının tətbiqi; Resurslarla işləyərkən istifadə olunan məhdudlaşdırıcı və genişləndirici alətlər; Nəşrlərin yüklənməsi, göndərilməsi, sitat gətirilməsi və ixrac edilməsi; Mövzu başlıqları (subject headings) əsasında axtarışın qurulması; Platformada şəxsi hesabın yaradılmasının əhəmiyyəti; Mövzu bildirişlərinin və yeni jurnal buraxılışları ilə bağlı xəbərdarlıqların qurulması və digər faydalı imkanlar.

Seminarda iştirak edən bütün iştirakçılara sertifikatlar təqdim olunub.

Onlayn seminar universitetin professor-müəllim heyəti, tədqiqatçılar, magistrantlar və tələbələr tərəfindən maraqla qarşılanıb və EBSCOhost platformasından istifadəyə dair biliklərin artırılmasına mühüm töhfə verib.