2025-ci il fevralın 6-da Xəzər Universitetinin Dillər və ədəbiyyatlar departamentinin doktorantı Günay Yaşar qızı Yediyarlının filologiya üzrə fəlsəfə doktoru elmi dərəcəsi almaq üçün yerinə yetirdiyi “Çağdaş nəsrdə qaçqınlıq konseptinin bədii, sosial-psixoloji aspektləri və təzahür formaları"(elmi rəhbər: dos. Dilbər Zeynalova) mövzusunda dissertasiya işinin ilkin müzakirəsi keçirilmişdir. İlkin müzakirədə Dillər və ədəbiyyatlar departamentinin professor-müəllim heyəti, doktorant və dissertantlar, müvafiq ixtisas üzrə mütəxəssislər və Təbiət elmləri, sənət və texnologiya yüksək təhsil fakültəsinin dekanı Günel Bahəddinova iştirak etmişdir.

 Doktorant Günay Yediyarlı çıxışında dissertasiya işinin aktuallığını əsaslandırmış, tədqiqatın məqsəd və vəzifələrini, elmi yeniliyini, metodoloji əsaslarını və əsas nəticələrini ətraflı şəkildə təqdim etmişdir. Çıxışda çağdaş nəsrdə qaçqınlıq konseptinin bədii və sosial-psixoloji aspektlərinin sistemli şəkildə araşdırıldığı vurğulanmışdır.

İclasa sədrlik edən Prof. Bədirxan Əhmədli təqdim olunmuş dissertasiyanı tamamlanmış elmi tədqiqat işi kimi yüksək qiymətləndirib. Rəyçilər dissertasiya işinin mövzusunun aktuallığını, seçilmiş elmi yanaşmanın məqsədəuyğunluğunu və əldə olunmuş nəticələrin elmi dəyərini müsbət qiymətləndirmiş, eyni zamanda işlə bağlı bir sıra irad və tövsiyələrini bildirmişlər. Müzakirə zamanı çıxış edənlər dissertasiya işinin nəzəri və praktik əhəmiyyətini qeyd etmiş, tədqiqatın ayrı-ayrı məqamları ilə bağlı iddiaçıya suallar ünvanlamışlar. Doktorant tərəfindən verilən cavablar qənaətbəxş hesab olunmuşdur.

 İclasın sonunda dissertasiya işinin filologiya üzrə fəlsəfə doktoru elmi dərəcəsi almaq üçün Ali Attestasiya Komissiyası tərəfindən  qoyulan tələblərə cavab verdiyi haqqında qərar layihəsi hazırlanmış və yekdilliklə qəbul edilmişdir.