2026-cı il yanvarın 31-də Xəzər Universitetinin təşkilatçılığı ilə Bakı Musiqi Akademiyası nəzdində Opera Studiyasının Konsert salonunda universitetin Musiqi və incəsənət departamentinin müəllimi, tanınmış sənətkar, ölkədə və xaricdə bir sıra müsabiqə və festivalların mükafatçısı Aşıq Ramin Qarayevin “Sazımda – Avazımda” adlı solo konserti keçirildi. Tədbirdə universitetin rəhbərliyi, əməkdaşları, musiqi ictimaiyyətinin nümayəndələri və musiqisevərlər iştirak edirdilər.

Tədbirdə Xəzər Universitetinin təsisçisi, Direktorlar və Qəyyumlar Şurasının sədri Prof. Akad. Hamlet İsaxanlı çıxış edərək, Azərbaycan və Gürcüstan aşıqlarının tarixən və hazırda bu ümumxalq sənətinin əlaqəli inkişafına səy göstərdiklərindən, bir neçə il əvvəl ustad Aşıq Kamandarın 90 illik yubileyinin Xəzər Universitetində təntənə ilə keçirilməsindən söz açdı,    Aşıq Ramin Qarayevin universitetdəki pedaqoji və aşıq kimi yaradıcı fəaliyyətindən danışaraq, nailiyyətlərini qeyd etdi.

Konsert Xəzər Universitetinin Kamera orkestri və saz qrupunun müşayiəti, həmçinin   universitetin qızlardan ibarət xor kollektivinin iştirakı ilə  keçdi.

Aşıq Ramin Qarayev Osmanlı divanisi (Şair Ağacan), Naxçıvani (Elxan Məmmədli), Koroğlu dübeytisi (Murad Niyazlı), Mansırı (Hüseyn Cavan),  Gəraylı (Mövlud Şəmistanoğlu), Gilənar (Səfər Verdiyev), Nə mən döndüm, nə sən döndün (Hamlet İsaxanlı, bəstə Ramin Qarayev), Kərəm gözəlləməsi (Zəlimxan Yaqub), İncəgülü (Aşıq Veysəl), Nar ağacı, nar çiçəyi (Nəbi Xəzri), Borçalım (Aşıq Kamandar) və Baş müxəmməs (Aşıq Ələsgər) havalarını, həmçinin Hamlet İsaxanlının sözlərinə özünün bəstələdiyi mahnını ifa etdi.

Konsertdə Xalq artisti  Gülyaz Məmmədova, həmçinin universitetin vokal müəllimi Məhsəti Cabbarova çıxış ediblər. Xalq artisti Gülyaz Məmmədova Hamlet İsaxanlının sözlərinə bəstələnmiş mahnını (bəstə Tahir Əkbərin) səsləndirib.

Konsertin sonunda Prof. Mahmud Kamaloğlu Aşıq Kamandar Ev Muzeyinin direktoru Əfəndiyev Əflatun Kamandar oğlu və İdarə heyətinin qərarı ilə  Hamlet İsaxanlıya və Aşıq Ramin Qarayevə “Aşıq Kamandar medalı”nı təqdim etdi.