2026-cı il  yanvarın 29-da Xəzər Universiteti Elmi Şurasının növbəti iclası keçirildi. İclasa universitetin rektoru, Dr. Raziyə İsayeva sədrlik etdi və gündəlikdə duran məsələləri Elmi Şura üzvlərinin diqqətinə çatdırdı.

Sədr Xəzər Universitetində yeni vəzifə təyinatının həyata keçirildiyini bildirdi. Kimya və kimya mühəndisliyi departamentinin koordinatoru vəzifəsinə təyin olunmuş Tahir Cavadzadə tutduğu vəzifəyə uyğun olaraq, Elmi Şuranın üzvlüyünə daxil edildi.

Növbəti məsələ Prof. Bədirxan Balaca oğlu Əhmədovun “XX əsr Azərbaycan ədəbiyyatı tarixi. İcmallar, təhlillər, portretlər” adlı üçcildlik dərsliyinin Dövlət mükafatına təqdim olunması haqqında idi. Dillər və ədəbiyyatlar departamentinin müdiri Dos. Dilbər Zeynalova Prof. Bədirxan Əhmədovun Xəzər Universitetində uzunillik elmi-pedaqoji fəaliyyəti, Azərbaycan ədəbiyyatşünaslığı sahəsində xidmətləri, həmçinin üçcildlik dərsliyin elmi, tədris və metodoloji baxımdan əhəmiyyəti haqqında ətraflı məlumat verdi. O qeyd etdi ki, sözügedən dərslik XX əsr Azərbaycan ədəbiyyatının sistemli şəkildə öyrənilməsi, elmi təhlili və ümumiləşdirilməsi baxımından mühüm mənbə olmaqla yanaşı, ali təhsil müəssisələrində tədris prosesində geniş istifadə üçün də nəzərdə tutulmuşdur.

Prof. Bədirxan Əhmədov müəllifi olduğu dərslik barədə qısa xülasə təqdim edərək, əsərin strukturu, əsas məzmun xətti və elmi yenilikləri haqqında məlumat verdi.

Məsələ Elmi Şura üzvləri tərəfindən müzakirə olundu və müzakirələrin nəticəsi olaraq Prof. Bədirxan Əhmədovun “XX əsr Azərbaycan ədəbiyyatı tarixi. İcmallar, təhlillər, portretlər” adlı üçcildlik dərsliyinin Azərbaycan Respublikası Elm, texnologiya, memarlıq, mədəniyyət və ədəbiyyat üzrə Dövlət Mükafatları Komissiyasına təqdim edilməsi barədə vəsatət qaldırılması haqqında yekdilliklə qərar qəbul edildi.

Rektor Raziyə İsayeva Xəzər Universitetinin beynəlxalq reytinqlərdə, xüsusilə QS reytinq sistemində təmsil olunması ilə bağlı görülən və planlaşdırılan işlər barədə Elmi Şura üzvlərini ətraflı məlumatlandırdı. O vurğuladı ki, universitetin beynəlxalq nüfuzunun artırılması və reytinqlərdə mövqeyinin gücləndirilməsi hər bir əməkdaşın fəal iştirakı və məsuliyyətli yanaşmasını tələb edir. Rektor qeyd etdi ki, Xəzər Universitetinin bütün akademik və inzibati heyəti beynəlxalq reytinqlərdə, o cümlədən QS göstəriciləri üzrə müəyyən edilmiş meyarlar və istiqamətlər çərçivəsində sistemli şəkildə fəaliyyət göstərməli, bu prosesə töhfə verməlidir.

Bununla da Elmi Şuranın növbəti iclası başa çatdı.