2026-cı il yanvarın 26-da DIRNA layihəsi çərçivəsində tərəfdaş universitetlərin iştirakı ilə növbəti onlayn seminar təşkil olunub. Seminar Xəzər Universitetinin Kitabxana-İnformasiya Mərkəzinin direktoru Aytac Misgərlinin moderatorluğu ilə keçirilib.

Tədbir layihənin 4-cü iş zərfinə uyğun olaraq D4.5 – “Tədqiqat Fəaliyyətləri üzrə Daimi Seminarlar” tapşırığı çərçivəsində baş tutub.

“İnformasiya sistemlərinə etibar və məlumatların səmərəli istifadəsi” mövzusunda keçirilən seminarın təlimçiləri Finlandiyanın Jyväskylä Universitetinin nümayəndələri Dr. Saana Mehtälä və Dr. Kati Clements olmuşlar.

Seminar zamanı təlimçi informasiya sistemləri, rəqəmsal əlçatanlıq və sistem xüsusiyyətləri barədə ətraflı məlumat verib. O, informasiya sistemlərinin üç əsas xüsusiyyətini vurğulayıb: davamlılıq, dəyişiklik və dinamik münasibətlər.

Sonra informasiya sistemlərində məlumatların idarə olunması mövzusuna toxunulub. Bildirilib ki, məlumatların necə saxlanıldığı, hansı müddət ərzində qorunduğu və məlumatın xüsusiyyətlərinə uyğun olaraq kimlərə çıxış verildiyi aydın və şəffaf şəkildə müəyyən edilməlidir.

Seminar çərçivəsində, həmçinin. məlumatın şəffaflıq və etibar anlayışları müzakirə olunub. Qeyd edilib ki, bu anlayışlar informasiya sistemlərindən məsuliyyətli və etik istifadənin təmin olunmasında mühüm rol oynayır.