2026-cı il yanvarın 23-də Xəzər Universitetinin Mərmər zalında Nailəxanım Təqaüd Proqramının mükafatlandırma tədbiri keçirilib.

Azərbaycan Respublikasının Dövlət Himninin səsləndirilməsi ilə başlayan tədbirdə Xəzər Universitetinin təsisçisi, Direktorlar və Qəyyumlar Şurasının sədri Prof.Akad. Hamlet İsaxanlı, universitetin əməkdaşları və məzunları, Azərbaycanda akkreditə olunmuş 10-dan çox səfirliklərin nümayəndələri, ali təhsil müəssisələrinin rəhbərləri, eləcə də müxtəlif beynəlxalq və yerli təşkilatların nümayəndələri iştirak ediblər. Geniş və müxtəlif qonaq tərkibi tədbirin beynəlxalq əhəmiyyətini və Nailəxanım Təqaüd Proqramına olan yüksək marağı bir daha nümayiş etdirib.

Tədbir çərçivəsində Efiopiya vətəndaşı Fieruz Juhar Nailəxanım Təqaüd Proqramının qalibi kimi mükafatlandırılıb. Fieruz Juhar yüksək akademik göstəriciləri, təhsil prosesində fəallığı, liderlik bacarıqları və sosial təşəbbüslərdə iştirakı ilə Nailəxanım Təqaüd Proqramının əsas meyarlarına  tam uyğunluğu ilə seçilib.

Tədbirdə çıxış edən Xəzər Universitetinin rektoru Dr. Raziyə İsayeva və Nailəxanım Fondunun rəhbəri Aygün Gardiner proqramın gənclərin təhsilinə verdiyi töhfəni, beynəlxalq tələbələrin dəstəklənməsinin əhəmiyyətini və bu təşəbbüsün cəmiyyətdə sosial məsuliyyət və liderlik dəyərlərinin formalaşmasına xidmət etdiyini vurğulayıblar. Fieruz Juhara sertifikat təqdim olunub.

Tədbir mədəni-bədii proqram, musiqi çıxışları və Nailəxanım Fondunun fəaliyyəti və təqaüd proqramının təsirini əks etdirən videoçarxın nümayişi ilə davam edib.

Sonda vurğulanıb ki, səfirliklərin və müxtəlif qurumların geniş təmsil olunduğu bu cür tədbirlər ali təhsil müəssisələri ilə beynəlxalq tərəfdaşlar arasında əməkdaşlığın möhkəmləndirilməsinə və multikultural dəyərlərin təşviqinə mühüm töhfə verir.