Xəzər Universiteti Humanitar, təhsil və sosial elmlər fakültəsinin Filologiya ixtisası üzrə IV kurs tələbələrinin AMEA Folklor İnstitutunda elmi-tədqiqat təcrübəsi başa çatıb.

Təcrübə çərçivəsində tələbələr oktyabr-dekabr ayları ərzində institutun fəaliyyətini yaxından öyrənib, folklorşünaslıq sahəsində aparılan elmi tədqiqatlar, nəşrlər və aktual problemlər haqqında məlumat əldə ediblər. Onlar, həmçinin, bir sıra elmi tədbirlərdə, o cümlədən I Beynəlxalq Türk Dünyası Ənənəvi Musiqi və Mədəni Kimlik Simpoziumunda, “Qərbi Azərbaycan folkloru: problemlər və perspektivlər” II Respublika elmi konfransında, “Laçın: mədəni yaddaşın folklordan görünən izləri”, Qarabağda Şanlı Zəfərin 5 illiyinə həsr olunmuş “Qırx dörd günün Zəfər dastanı”, eləcə də “Bəxtiyar Vahabzadə yaradıcılığının folklor konteksti” mövzularında keçirilən elmi sessiyalarda məruzə və çıxışlar ediblər.

2026-cı il yanvarın 22-də təcrübənin yekunlarına aid yığıncaqda AMEA Folklor İnstitutunun direktoru, filologiya elmləri doktoru Hikmət Quliyev çıxışında tələbələrin elmi-tədqiqat təcrübəsində iştirakının onların yeni bilik və bacarıqlar qazanması üçün uğurlu platforma olduğunu vurğulayıb. O, qeyd edib ki, bu təcrübələr tələbələrin elmi dünyagörüşünün formalaşmasına və gələcək elmi karyeralarına ciddi töhfə verir.

Xəzər Universitetinin Dillər və ədəbiyyatlar departamentinin müdiri, filologiya üzrə fəlsəfə doktoru, Dos. Dilbər Zeynalova da çıxış edərək bildirib ki, nəzəri biliklərin auditoriya mühitində öyrənilməsi kifayət etmir, tələbələrin praktiki və elmi-tədqiqat təcrübəsi, alimlərlə birbaşa ünsiyyəti və elmi mənbələrdən istifadə bacarıqları müasir ixtisaslı kadrların hazırlanmasında xüsusi əhəmiyyət daşıyır.

Güney Azərbaycan folkloru şöbəsinin müdiri, filologiya elmləri doktoru, Dos. Mətanət Abbasova və Folklor və yazılı ədəbiyyat şöbəsinin müdiri, filologiya elmləri doktoru, Dos. Leyla Məmmədova çıxış edərək, tələbələrin təcrübə müddətində fəal iştirakını və elmi-tədqiqat işlərinə böyük maraq göstərdiklərini xüsusi vurğulayıblar.

Təcrübə müddətində tələbələrin fəaliyyəti iştirak səviyyəsi, təqdimat bacarığı, elmi müzakirələrdə fəallıq, tezis və yekun hesabatların hazırlanması, eləcə də folklor faktlarının qeydə alınması kimi meyarlara əsasən qiymətləndirilib.

Tədbirin sonunda institutun direktoru Hikmət Quliyev tələbələrə sertifikatları təqdim edib.