20 yanvar 2026-cı il tarixində Tarix və Arxeologiya Departamentinin müdiri, Dos. Telman Nüsrətoğlu 20 Yanvar faciəsinin ildönümü münasibətilə Türkiyə və Azərbaycan televiziya kanallarının bir sıra proqramlarında canlı yayıma qonaq olub.

Tarix elmləri doktoru, dosent Telman Nüsrətoğlu TRT Haber, TRT Avaz, AZTV, REAL TV və ARB24 kanallarının müxtəlif analitik və ictimai-siyasi proqramlarında çıxış edərək, 1990-cı illərin əvvəllərində Azərbaycan xalqının apardığı milli istiqlal mübarizəsini, Sovet imperiyasının azadlıq tələbi ilə ayağa qalxmış dinc əhaliyə qarşı həyata keçirdiyi 20 Yanvar qətliamının siyasi, tarixi və geosiyasi səbəblərini geniş şəkildə təhlil edib.

Canlı yayımlar zamanı o, Bakıda və digər bölgələrdə meydanlara çıxaraq erməni silahlı dəstələrinin təcavüzünə və ərazi bütövlüyünə yönəlmiş təhdidlərə qarşı müqavimət göstərən Azərbaycan xalqına qarşı tətbiq edilən zorakılığın imperiya siyasətinin tərkib hissəsi olduğunu vurğulayıb. Dosent Nüsrətoğlu 20 Yanvar hadisələrinin Azərbaycan xalqının azadlıq iradəsini sındırmadığını, əksinə milli birliyi gücləndirdiyini və müstəqillik yolunda həlledici mərhələ təşkil etdiyini qeyd edib.

Çıxışlarda faciənin tarixi yaddaşda tutulmasının, beynəlxalq ictimaiyyətə düzgün çatdırılmasının və gələcək nəsillərə obyektiv şəkildə ötürülməsinin əhəmiyyəti də xüsusi olaraq qeyd edilib.