15 yanvar 2026-cı il tarixində Xəzər Universitetinin Həyat Elmləri Departamentinin müəllimi Gülafət Şəfiyevanın rəhbərliyi ilə “Biologiya müəllimliyi” və “Kimya-biologiya müəllimliyi” ixtisasları üzrə təhsil alan IV və V kurs tələbələri “Ekol Mühəndislik Xidmətləri” QSC-yə məxsus “Eko Park” İnnovasiya Mərkəzinə ekskursiya ediblər.

Ekskursiya çərçivəsində tələbələr üçün maarifləndirici tədbir təşkil olunub. Tədbirin açılışında Ətraf Mühitin Monitorinqi Departamentinin rəisi Sabutay Əliyev çıxış edərək bildirib ki, park ərazisində mövcud olan su mənbəyi, hər biri 10 kVt gücündə üç külək turbini, eləcə də binaların damlarında quraşdırılmış günəş panelləri hesabına ərazi tam şəkildə bərpa olunan enerji mənbələri ilə elektrik enerjisi ilə təmin olunur.

Daha sonra ƏMMD-nin ekoloqu Mehriban Ələsgərova müxtəlif istehsal müəssisələri üçün hazırlanmış ekoloji pasportlar, onların əhəmiyyəti və hazırlanma qaydaları barədə ətraflı məlumat verib.

ƏMMD-nin zooloqu Selcan Hüseynli və bioloqu Cəfər Səfərov isə müxtəlif ərazilərdə çirklənmə səviyyəsinin müəyyən edilməsi məqsədilə heyvan və bitki nümunələri üzərində aparılan analizlər haqqında danışıblar.

Park əməkdaşlarının verdiyi məlumata əsasən, ərazi əvvəllər neft-qaz hasilatı idarəsinin istifadəsində olub və torpaq neft tullantıları ilə çirklənmiş vəziyyətdə idi. SOCAR tərəfindən aparılan rekultivasiya işləri nəticəsində ərazi bərpa olunaraq hazırda ekoloji park kimi fəaliyyət göstərir.

Tədbirin sonunda Sabutay Əliyev universitetlə əməkdaşlığın davam etdirilməsinin vacibliyini vurğulayaraq, gələcəkdə debatların təşkili və tələbələrin kiçik qruplar şəklində sahə tədqiqatlarına cəlb olunması ilə bağlı təkliflər irəli sürüb.