2026-cı il yanvarın 6-da Xəzər Universiteti Psixologiya Departamentinin əməkdaşı və Xəzər Psixoloji Xidmət Mərkəzinin psixoloqu Mirsadiq Muxtarov SİA.AZ xəbər saytına müsahibə vermişdir. Psixoloq müasir dövrdə insanların süni intellektlə ünsiyyətə meylinin artması, bu meylin psixoloji və sosial səbəbləri, eləcə də insanlararası münasibətlərə təsiri haqqında ətraflı fikirlərini bölüşmüşdür.

O bildirib ki, süni intellektlə ünsiyyətin artmasını tək bir səbəblə izah etmək mümkün deyil və burada həm fərdi psixoloji-emosional vəziyyət, həm də insanlararası münasibətlərdə baş verən dəyişikliklər mühüm rol oynayır. Mirsadiq Muxtarov qeyd edib ki, süni intellekt mühakimə etmədən dinləməsi, hər an əlçatan olması və sosial risk daşımaması baxımından insanlar üçün rahatlıq yaradır. Texnologiyanın həyatımıza təsirinin artması insanlararası münasibətlərin zəifləməsinə, üz-üzə ünsiyyətin azalmasına və empatiya çatışmazlığına səbəb olur. Real münasibətlərdə diqqətsizlik və anlaşılmamaq halları artdıqca, insanlar emosional yaxınlıq qurmaqda çətinlik çəkir və mühakimə etməyən alternativlərə yönəlirlər. Əlavə olaraq bildirilib ki, insanlar süni intellekt qarşısında zəif tərəflərini, qorxularını və gizli düşüncələrini paylaşmaqdan çəkinmirlər və bu xüsusiyyətlər onun istifadəsinin artmasına zəmin yaradır.

Yekunda psixoloq vurğulayıb ki, süni intellekt həqiqi sevgi və empatiyanı əvəz edə bilməz və yalnız onların təqlidini edərək insanın dinlənilmək və anlaşılmaq ehtiyacını qismən ödəyə bilər. Texnologiya rahatlıq və dəstək təqdim etsə də, insan münasibətlərinin dəyəri və onların inkişafı əvəzolunmazdır.

Müsahibənin tam versiyası aşağıdakı linkdə:

https://sia.az/az/news/social/1311066.html