Azərbaycan Turizm və Menecment Universiteti (ATMU) və Xəzər Universiteti Avstriyanın IMC Krems Tətbiqi Elmlər Universiteti arasında həyata keçirilən ikili diplom proqramı və tələbə mübadiləsi layihəsi uğurla davam edir və beynəlxalq akademik əməkdaşlıq sahəsində yeni imkanlar yaradır.

2007-ci ildən etibarən ATMU ilə Avstriyanın Krems Universiteti arasında imzalanan akademik əməkdaşlıq müqaviləsinə əsasən həyata keçirilən Azərbaycan-Avstriya Turizm Proqramı çərçivəsində tələbələr üç tədris ilini beynəlxalq keyfiyyət standartlarına uyğun şəkildə keçərək, iki diplom əldə edirlər — həm ATMU, həm də IMC Krems Universitetindən. Bu proqram turizm və menecment sahəsində təhsilin beynəlxalq səviyyədə tanınmasını təmin etməklə yanaşı, tələbələrə Avstriyada təhsil almaq və yüksək ixtisaslı ekspertlərlə işləmək imkanı yaradır.

2025/2026-cı tədris ilindən etibarən Xəzər Universiteti ilə Azərbaycan Turizm və Menecment Universiteti arasında imzalanmış əməkdaşlıq müqaviləsi çərçivəsində bu proqramın tətbiq dairəsi daha da genişləndirilmişdir. Xəzər Universitetinin İqtisadiyyat və Menecment fakültəsinin Turizm işinin təşkili ixtisası üzrə təhsil alan tələbələri ikili diplom proqramına cəlb olunmuşdur. Layihənin növbəti tədris illərində də davam etdirilməsi və tələbə mübadiləsi imkanlarının genişləndirilməsi nəzərdə tutulur.