Xəzər Universiteti ilə “PAŞA Holdinq”ə daxil olan “Agro Dairy” şirkəti və “Aqrar Məşvərət Şurası İctimai Birliyi” arasında əməkdaşlığın genişləndirilməsi, kənd təsərrüfatı və baytarlıq sahələrində müasir çağırışlara cavab verən yeni tərəfdaşlıq istiqamətlərinin müəyyənləşdirilməsi məqsədilə 2026- cı il sentyabrın 17- də  görüş keçirilmişdir.

Görüşdə “Agro Dairy” şirkəti İdarə Heyətinin və “Aqrar Məşvərət Şurası İctimai Birliyi”nin sədri Niyazi Əmirbəyov, “Azərbaycan Quş Əti, Yumurta İstehsalçıları və İxracatçıları Assosiasiyası”nın sədri, “Aqrar Məşvərət Şurası İctimai Birliyi”nin nümayəndəsi Mürvət Həsənli, eləcə də hər iki qurumun əməkdaşları iştirak etmişlər.

Xəzər Universitetini görüşdə rektor Dr. Raziyə Isayeva, Hasvet Baytarlıq Təbabəti fakültəsinin dekanı Dr. Çiçək Əliyeva, Təbiət elmləri və Mühəndislik fakültəsinin dekanı Dr. Fəxrəndə Əfəndiyeva, Təbiət elmləri, Sənət və Texnologiya yüksək təhsil fakültəsinin dekanı Dr. Günel Bahəddinova, həmçinin, Baytarlıq Təbabəti departamentinin müdiri Dr. Səbinə Məmmədova təmsil etmişlər.

Tərəflər arasında tələbələrin yalnız nəzəri biliklərlə deyil, eyni zamanda müasir istehsalat və peşə mühiti ilə birbaşa tanışlığını təmin edən təcrübə və staj proqramlarının genişləndirilməsi, karyera imkanlarının artırılması, birgə elmi-tədqiqat layihələrinin hazırlanması, eləcə də aqrar sektorun ehtiyaclarına uyğun mütəxəssis hazırlığının gücləndirilməsi istiqamətləri müzakirə edilmişdir.

Görüş çərçivəsində Xəzər Universitetinin Hasvet Baytarlıq Təbabəti fakültəsinə 617 balla qəbul olmuş Xaliq Zeynallıya “Agro Dairy” şirkəti tərəfindən kompüter hədiyyə olunmuşdur. Bununla yanaşı, tələbənin təhsilini uğurla davam etdirməsi və akademik inkişafının dəstəklənməsi məqsədilə “Aqrar Məşvərət Şurası İctimai Birliyi”nin və “Azərbaycan Quş Əti, Yumurta İstehsalçıları və İxracatçıları Assosiasiyası”nın təqaüd proqramı çərçivəsində dəstək göstərəcəyi bildirilmişdir.

Görüşün yekununda Xəzər Universiteti ilə “Agro Dairy” şirkəti, həmçinin, Xəzər Universiteti ilə “Aqrar Məşvərət Şurası İctimai Birliyi” arasında Əməkdaşlıq Memorandumu imzalanmışdır.

İmzalanan memorandumlar çərçivəsində tərəflər arasında təhsil, elmi-tədqiqat, praktiki hazırlıq, tələbə təcrübəsi, karyera inkişafı və birgə layihələrin həyata keçirilməsi istiqamətlərində əməkdaşlığın genişləndirilməsi nəzərdə tutulur. Yeni tərəfdaşlığın universitet–istehsalat əlaqələrinin möhkəmləndirilməsinə, tələbələrin əmək bazarının real tələblərinə uyğun hazırlanmasına və aqrar sektor üçün yüksəkixtisaslı kadr potensialının formalaşdırılmasına töhfə verməsi gözlənilir.

Xəzər Universiteti ilə “PAŞA Holdinq”ə daxil olan “Agro Dairy” şirkəti və “Aqrar Məşvərət Şurası İctimai Birliyi” arasında əməkdaşlığın yeni perspektivləri müzakirə olunub.