Xəzər Universiteti yarandığı ildən universitetdə tarix müəllimi kimi fəaliyyətə başlayan pedaqoq və tarixçi alim Roza Arazova 2025-ci il dekabrın 30-da vəfat etmişdir.

 Roza Binnət qızı Arazova 1947-ci il aprel ayının 15-də Ermənistanın, Novemberyan rayonunun Aşağı Körpülü kəndində anadan olmuşdur. 1954-1965-ci illərdə   Ukraynanın Krasnoarmeysk şəhərində orta məktəbi,  1965-1970-ci illərdə   Azərbaycan Dövlət Universitetinin (indiki Bakı Dövlət Universiteti) Tarix fakültəsini bitirmişdir.

1967-1970-ci illərdə   Azərbaycan SSR EA Tarix İnstitutunun Qədim arxeologiya şöbəsində laborant işləmişdir.  1970-1973-cü illərdə institutun aspiantı olmuş,   1974-cü ildə “Azərbaycan ərazisində e.ə. VI-IV minilliklərdə qədim əkinçilik-maldarlıq mədəniyyəti (daş əmək alətləri əsasında)” mövzusunda namizədlik dissertasiyası müdafiə etmişdir.  

1974-1980-ci illərdə Tarix İnstitutunun Arxeologiya və Etnoqrafiya bölməsində elmi işçi vəzifəsində çalışarkən Azərbaycanda erkən əkinçilik mədəniyyəti problemi ilə məşğul olmuşdur Qəbələ, Azıx, Füzuli, Mil-Muğan, Quba-Xaçmaz Rusiya, Moldova, Baltikayanı ölkələr və Orta Asiyada aparılan arxeoloji ekspedisiyalarda iştirak edib

1980-1995-ci illərdə Azərbaycan Dövlət Pedagoji Universitetində baş müəllim, dosent vəzifələrində çalışıb.

1991-ci ildən həyatının sonuna qədər  Xəzər Universitetində tarix müəllimi, Tarix və arxeologiya departamentinin müdiri, “Azərbaycan Arxeologiyası” jurnalının baş redaktor müavini işləmişdir.

R. Arazova 60-dən artıq elmi məqalə, 2 monoqrafiya və 1 dərsliyin müəllifidir.

Səmimi və təvazökar insan, qayğıkeş müəllim Roza Arazovanın əziz xatirəsi onun tanıyanların qəlbində hər zaman yaşayacaqdır.

Allah rəhmət eləsin!

                                                                                    Xəzər Universitetinin kollektivi