2025-ci il  dekabrın 26-da  Xəzər Universitetində Tarix və arxeologiya departamenti ilə Türkçü Düşüncə Birliyinin birgə təşkilatçılığı ilə “Beşinci Türkçülük Çalışmaları” adlı elmi konfrans keçirildi. Konfrans “Milli və Çağdaş Təhsil Gərəyi” mövzusuna həsr olundu və müasir təhsil sistemlərinin milli dəyərlər və çağdaş elmi yanaşmalar kontekstində dəyərləndirilməsi əsas diqqət mərkəzində saxlanıldı.

Konfransın açılışında Tarix və arxeologiya departamentinin müdiri, dosent Telman Nüsrətoğlu çıxış edərək, iştirakçıları salamladı və tədbirin elmi əhəmiyyətini vurğuladı.

Konfransın əsas məruzələrindən biri Xəzər Universitetinin təsisçisi, Direktorlar və Qəyyumlar Şurasının sədri Prof.Akad. Hamlet İsaxanlı tərəfindən “Dünyada təhsil: antik dövrdən günümüzədək” mövzusunda təqdim olundu. Məruzədə ali təhsilin tarixi inkişaf mərhələləri sistemli şəkildə təhlil edildi; Platonun Akademiyası və Aristotelin Liseyi, İskəndəriyyə Kitabxanası, İslam dünyasında isə Beytül-Hikmə və Nizamiyyə mədrəsələrinin ali təhsilin formalaşmasındakı rolu xüsusilə qeyd olundu.

Məruzədə Avropada universitetlərin yaranması, diplom və elmi dərəcə sistemlərinin təşəkkülü, Almaniyada formalaşan Humboldt modelinin ali təhsildə yaratdığı dönüş, eləcə də ABŞ ali təhsil modelinin əsas xüsusiyyətləri ətraflı şəkildə şərh edildi. H. İsaxanlı müasir ali təhsilin milli-mədəni dəyərlərə söykənməklə yanaşı, qlobal elmi standartlara uyğun inkişaf etməsinin zəruriliyini vurğuladı və bu kontekstdə Xəzər Universitetinin təhsil sahəsindəki mövqeyinə diqqət çəkdi.

Konfransda  Prof. Dr. Nəsib Nəsibli, Böyükağa Mikayıllı, Dr. Aygül İsayeva, Dos. Aynur Qəzənfərqızı, Yasəmən Qaraqoyunlu, Dr. Limunət Əmrahlı, Prof. Dr. Ədalət Tahirzadə, Dr. Odər Qutluər və Dos. Dr. Faiq Ələkbərli müxtəlif mövzularda məruzələrlə çıxış etdilər. Məruzələrdə türkçülük düşüncəsi, milli ideologiya, tarix, mədəniyyət və təhsil problemləri elmi müstəvidə müzakirə olundu.

Konfrans fəal müzakirələrlə yekunlaşdı və milli, eləcə də çağdaş təhsil məsələləri ətrafında səmərəli fikir mübadiləsi aparıldı.