Bakı Şəhər Baş Polis İdarəsinin Yetkinlik Yaşına Çatmayanlarla Profilaktiki İşin Təşkili Bölməsinin (YYÇPİTB) təşkilatçılığı ilə 2025-ci il dekabrın 24-də Bakının Nəsimi rayonundakı İlqar Əbilhəsənov adına 42 nömrəli tam orta məktəbdə “Narkomaniyaya yox deyək” mövzusunda maarifləndirici seminar keçirilib.

Tədbirdə Xəzər Universitetinin Psixologiya departamentinin əməkdaşı, Xəzər Psixoloji Xidmət Mərkəzinin psixoloqu Mirsadiq Muxtarov çıxış edərək, maddə asılılığının cəmiyyət üçün yaratdığı psixoloji və sosial problemlərə toxunub. O, bu problemin erkən mərhələdə aşkarlanmasının vacibliyini vurğulayıb, profilaktik tədbirlərin və maarifləndirmə işlərinin əhəmiyyətindən danışıb. Psixoloq, həmçinin, ailə və təhsil mühitinin asılılığın qarşısının alınmasında oynadığı rolu qeyd edərək, sağlam həyat tərzinin təşviqinin gənclərin inkişafı baxımından mühüm olduğunu diqqətə çatdırıb.

Tədbirdə Bakı şəhər Baş Polis İdarəsi YYÇPİTB-nin  rəisi - polis polkovniki İbrahim İsmayılov, baş inspektoru - polis mayoru Asim Babaxanov, inspektoru - polis baş leytenantı Aysel Hacıyeva, Nəsimi Rayon Polis İdarəsi YYÇPİTB-nin inspektoru polis mayoru Yeganə Zeynalova və Bakı Şəhəri Narkoloji Mərkəzinin narkoloq həkimi Günay Əsgərova iştirak etmişlər.

Tədbir şagird və müəllim heyətinin fəal iştirakı ilə interaktiv şəkildə keçirilmiş, mövzu ətrafında geniş fikir mübadiləsi aparılmış və suallar cavablandırılmışdır.