Xəzər Universitetinin Siyasi elmlər və fəlsəfə departamentinin müdiri Dos. Orxan Vəliyev və doktorantı Burcu Temür`ün "Sovet İttifaqından sonrakı Azərbaycanın xarici siyasəti" (“Sovyetler Birliği Sonrası Azerbaycan`ın Dış Politikası”) mövzusunda yazısı Necmettin Erbakan University Press (NEU Press) nəşriyyatının “Türk Dünyası Yıllığı 2024” adlı kitabında dərc edilmişdir. (Cild 1, № 477, səh. 27-56, 2025).

Müəlliflər Sovet İttifaqının dağılmasından sonra Azərbaycanın xarici siyasətinin formalaşma prosesini Qarabağ problemi və enerji resursları kimi əsas amillər kontekstində təhlil edirlər. Yazıda müstəqillikdən sonrakı dövrdə Azərbaycanın xarici siyasətinin müxtəlif liderlik mərhələlərindən keçdiyi, ilkin mərhələdə siyasi qeyri-sabitlik və idarəetmə təcrübəsinin zəifliyi ilə səciyyələndiyi, sonrakı dövrlərdə isə balanslaşdırılmış və strateji yanaşma əsasında möhkəmləndiyi qeyd olunur. Xüsusilə Heydər Əliyev dövründə enerji siyasətinin institusionallaşdırılması və İlham Əliyev dönəmində Qarabağın azad edilməsi amillərinin Azərbaycanın beynəlxalq mövqeyini əhəmiyyətli dərəcədə gücləndirdiyi vurğulanır.

Qeyd edək ki, Necmettin Erbakan University Press (NEU Press) 2012-ci ildən fəaliyyət göstərən və 2020-ci ildən beynəlxalq səviyyədə brendləşmiş bir universitet nəşriyyatıdır. Web of Science BKCI və CPCI-də indeksləşdirilmiş kitab və məqalələri olan NEU Press, 20-dən çox elmi jurnal və 300-dən çox elmi kitab nəşr edir. Nəşriyyat həm Türkiyə, həm də beynəlxalq aləmdə tanınır və EBSCO, Web of Science, ProQuest kimi platformalarla tərəfdaşlığa malikdir.