Xəzər Universitetinin Dillər və ədəbiyyatlar departamentinin müəllimi, filologiya üzrə fəlsəfə doktoru Gülşanə Xudiyeva tərəfindən Təbiət elmləri və mühəndislik fakültəsinin tələbələri üçün tədris olunan Azərbaycan ədəbiyyatı fənni çərçivəsində 2025-ci ilin noyabr və dekabr aylarında silsilə elmi-yaradıcı təqdimatlar təşkil olunub. Təqdimatların əsas mövzuları M.F. Axundzadə, C. Məmmədquluzadə, H. Cavid, C. Cabbarlı, Ə. Cavad, M.Ə Rəsulzadə, M. Müşfiq, S.Vurğun və Anarın yaradıcılığına həsr olunub.

Təqdimatlar zamanı tələbələr sərbəst elmi tədqiqatlar apararaq, kitabxanalarda mənbələri araşdıraraq, qazandıqları bilikləri akademik çıxışlar formasında təqdim ediblər. Dərslər zamanı bədii qiraət nümunələri səsləndirilib, yaradıcı səhnəciklər hazırlanıb, sorğular, interaktiv oyunlar və bilik yarışları keçirilib.

Bu təqdimatlar tələbələrin yaradıcılıq potensialının üzə çıxarılmasına, öz istedadlarını kəşf etmələrinə və Azərbaycan ədəbiyyatına maraq və sevgilərinin artmasına müsbət təsir göstərib.

Tədris prosesinin zənginləşdirilməsi məqsədilə tələbələr Azərbaycan Dövlət Akademik Dram Teatrında Hüseyn Cavidin “İblis" və Gənc Tamaşaçılar Teatrında Cəfər Cabbarlının “Aydın” əsərləri əsasında hazırlanmış tamaşalara baxıblar.

Qeyd edək ki, bu cür elmi-yaradıcı yanaşma ali təhsil müəssisələrində ədəbiyyat fənninin tədrisinin səmərəliliyinin artırılmasına və tələbələrin humanitar-estetik dünyagörüşünün formalaşdırılmasına xidmət edir.