2025-ci il dekabrın 22-23-də Xəzər Universitetinin Həyat elmləri departamentinin təşkilatçılığı ilə “Molekulyar marker məlumatlarının təhlili: Genetik müxtəliflik və populyasiya strukturu” adlı təlim kursu keçirilmişdir. Təlim İranın Təbriz Universitetinin Kənd təsərrüfatı fakültəsinin professoru Abolghasem Mohammadi tərəfindən aparılmışdır.

Təlimin birinci günü, əsasən, nəzəri biliklərə həsr olunmuşdur. Bu çərçivədə “Genetik müxtəlifliyin və populyasiya strukturunun analizi” (Analysis of Genetic Diversity and Population Structure), “DNT marker texnologiyalarına giriş” (An Introduction to DNA Marker Technologies), eləcə də “Populyasiya daxilində və populyasiyalar arasında genetik müxtəlifliyin qiymətləndirilməsi” (Assessing Within and Among Populations Genetic Diversity) mövzularında ətraflı mühazirələr təqdim edilmişdir.

Təlim kursunun ikinci günündə isə real molekulyar marker məlumatları əsasında statistik proqramlardan istifadə etməklə analizlərin aparılması və əldə olunan nəticələrin düzgün şərh edilməsi praktiki şəkildə izah olunmuşdur. Bu mərhələdə iştirakçılara müxtəlif statistik proqram təminatlarından, o cümlədən Cervus, MEGA, GenAlEx və STRUCTURE proqramlarından istifadə qaydaları əyani olaraq öyrədilmişdir.

Təlim kursunda Xəzər Universitetinin doktorant və bakalavr tələbələri ilə yanaşı, Bakı Dövlət Universiteti, Qərbi Kaspi Universiteti, Azərbaycan Elm və Təhsil Nazirliyinin Genetik Ehtiyatlar İnstitutu, Kənd Təsərrüfatı Nazirliyinin tabeliyində fəaliyyət göstərən Əkinçilik Elmi Tədqiqat İnstitutu, Azərbaycan Tibb Universiteti, Üzümçülük və Şərabçılıq Elmi Tədqiqat İnstitutu, həmçinin Gəncə şəhərində yerləşən Bitki Mühafizəsi və Texniki Bitkilər Elmi-Tədqiqat İnstitutunun elmi işçiləri və tələbələri iştirak etmişlər.

Təlim kursu iştirakçıların fəal iştirakı ilə interaktiv formatda keçmiş, mövzu ətrafında aparılan müzakirələr maraqlı elmi diskussiyalara və bilik mübadiləsinə şərait yaratmışdır.

Beləliklə, təlim kursu çərçivəsində əldə olunan bilik və praktiki təcrübə biomüxtəlifliyin öyrənilməsi, seleksiya proqramları və marker-əsaslı analizlərin aparılmasında effektiv şəkildə tətbiq olunmaqla yanaşı, bu sahə üzrə kadr hazırlığının inkişafına da mühüm töhfə verir.