Xəzər Universitetində 2025-ci il dekabrın 19-da unudulmuş qədim bayramlarımızdan olan “Çillə gecəsi”nə həsr edilmiş mədəni tədbir keçirildi. Tədbir “Xəzər MAFİ”- nin koordinatoru Aynur Qəzənfərqızının təşkilatçılığı və moderatorluğu ilə universitetin Mərmər salonunda təşkil olundu və geniş auditoriya tərəfindən maraqla qarşılandı.

Tədbirdə Amerikanın Corciya Ştatının Berri kollecinin tarixçi-antropoloq alimi Dr.Kelsey Rice, “Mirvarid Dilbazi Poeziya Məclisi” İctimai Birliyinin rəhbəri, Kəlağayı Muzeyinin direktoru, şair Güllü Eldar Tomarlı çıxış edərək, öz ürək sözlərini söylədilər.

Bayram əhval-ruhiyyəsində keçən tədbirdə Aynur Qəzənfərqızının yaratdığı Milli Qızlar Ansamblı “Çillə gecəsi” ilə bağlı hazırladıqları səhnə canlandırmasını təqdim etdi. Qədim xalq inanclarını, qış çilləsinin gəlişini, bolluq və bərəkət rəmzlərini əks etdirən bu çıxış tamaşaçılar tərəfindən alqışlarla qarşılandı.

Tədbirin bədii hissəsində universitetin Xor ansamblının bir-birindən gözəl ifaları tədbirə xüsusi ahəng qatdı. Milli musiqi nümunələrinin səsləndirilməsi zalda səmimi və isti bir mühit yaratdı, iştirakçılara xoş və yaddaqalan anlar yaşatdı.

Keçirilən tədbir milli-mənəvi dəyərlərimizin təbliği, unudulmaqda olan qədim bayram ənənələrimizin yaşadılması və gənc nəsilə ötürülməsi baxımından xüsusi əhəmiyyət daşıdı.

Aydan Əliyeva 

Xəzər Universiteti

Filologiya (Azərbaycan dili və Ədəbiyyatı) ixtisası üzrə 2-ci kurs tələbəsi.