2025-ci il dekabrın 25-də Xəzər Universiteti Elmi Şurasının növbəti iclası keçirildi. İclasa universitetin rektoru, Dr. Raziyə  İsayeva sədrlik etdi və gündəlikdə duran məsələləri Elmi Şura üzvlərinin diqqətinə çatdırdı.

İclasın əvvəlində sədr Xəzər Universitetində bir sıra yeni təyinatların həyata keçirildiyini bildirdi. Bununla əlaqədar olaraq tutduqları vəzifələrə görə elmi işlər üzrə prorektor Ülkər İsayeva, Təşkilati və sənədləşmə şöbəsinin müdiri Səbinə Quluyeva və İqtisadiyyat və menecment departamentinin koordinatoru Polad Orucov Elmi Şuranın üzvlüyünə daxil ediliblər.

Gündəliyin birinci məsələsi olaraq universitetin magistratura səviyyəsi üzrə məzun olmuş tələbələri haqqında Təbiət elmləri, sənət və texnologiya yüksək təhsil fakültəsinin dekanı Günel Bahəddinova və İqtisadiyyat və biznes yüksək təhsil fakültəsinin dekanı İnqilab Əhmədov məlumat verdilər. Çıxışlarda tələbələrin akademik göstəriciləri, ixtisasları və müvafiq statistik məlumatlar ətraflı şəkildə Elmi Şura üzvlərinin diqqətinə çatdırıldı. Təqdim olunan məzun siyahısı  Elmi Şura tərəfindən təsdiq edildi.

Gündəliyin ikinci məsələsi 2025-ci ildə doktoranturaya qəbul olunmuş tələbələrin dissertasiya mövzularının və elmi rəhbərlərinin təyini ilə bağlı oldu. Fakültə dekanları bu məsələ üzrə məlumat verdilər, doktorantlar isə dissertasiya işlərinin aktuallığı, məqsədi, tədqiqat sualları, istifadə olunacaq metodologiya və gözlənilən elmi nəticələr barədə çıxış etdilər. Çıxışlardan sonra Elmi Şura üzvləri tərəfindən doktorantlara suallar ünvanlandı və müvafiq qərarlar qəbul edildi.

Gündəliyin üçüncü və dördüncü məsələləri - final imtahan sessiyasının təşkili və 2025-2026-cı tədris ilinin yaz semestri üzrə dərs yükünün hazırlanması ilə bağlı tədris işləri üzrə prorektor Məhəmməd Nuriyev məlumat verdi. O, final imtahan sessiyasına hazırlıqla əlaqədar müvafiq tövsiyələrini söylədi. həmçinin yeni semestr üzrə dərs yüklərinin qısa müddət ərzində fakültələrə təqdim edilməsinin vacibliyini vurğuladı.

İclasın sonunda rektor Raziyə İsayeva hər bir departament üzrə fəaliyyət planlarının hazırlanmasının zəruriliyini qeyd etdi və həmin planlarda tədris, tədqiqat və institusional inkişaf istiqamətləri üzrə konkret tədbirlərin əks olunmalı olduğunu bildirdi.

Elmi Şura gündəlikdə yer alan bütün məsələlərin həlli ilə başa çatdı.