Xəzər Universiteti Fizika və elektronika departamentinin müdiri, Dos. Fəridə Tatardar Fudan Universitetinin “Ağıllı Materiallar və Gələcək Enerji” Kollecinin professoru Guodong Zhu`nun dəvəti ilə 2025-ci il dekabrın 8-18-də Çinin Şanxay şəhərində yerləşən Fudan Universitetində keçirilən “Qabaqcıl Pyezoelektrik Cihazlar üzrə Simpozium”da iştirak etmişdir.

Simpozium çərçivəsində Dos. Fəridə Tatardar “3D çaplı pyezoelektrik sensorlar: İspaniyada doktoranturadan sonrakı tədqiqat fəaliyyəti” mövzusunda çıxış etmişdir. Əvvəlcə Azərbaycan və Xəzər Universiteti haqqında ümumi məlumat verilmiş, sonra İspaniyada həyata keçirilən doktoranturadan sonrakı elmi-tədqiqat işləri və əldə olunan nəticələr iştirakçıların diqqətinə çatdırılmışdır. Simpoziumda Fudan Universitetindən olan digər tədqiqatçılar da çıxış edərək, pyezoelektrik əsaslı sensorlar sahəsində aparılan ən son elmi-tədqiqat və inkişaf işləri barədə məlumat vermişlər.

Simpoziumdan sonra iştirakçılar universitetin Tarix muzeyində Fudan Universitetinin yarandığı gündən bu günə qədər keçdiyi inkişaf yolu ilə tanış olmuşlar. Elmi tədqiqat və inkişaf fəaliyyətləri çərçivəsində pyezoelektrik sensorlar və tranzistor cihazlarının sintez və analizi üzrə tədqiqatların aparıldığı laboratoriyalara, həmçinin Optika və Elektronika laboratoriyalarına da baxış keçirildikdən sonra günəş batareyalarının istehsal mərhələləri ilə bağlı tədqiqatlar yerində ətraflı şəkildə araşdırılmışdır.

Prof. Guodong Zhu Azərbaycan və Türkiyə ilə birgə elmi layihələrin həyata keçirilməsində maraqlı olduqlarını bildirmiş, tərəflər 2026-cı ildə planlaşdırılan birgə layihələr üzrə əməkdaşlıq perspektivlərini müzakirə etmişlər.