Xəzər Universitetində 2025-ci il dekabrın 23-də Çin Xalq Respublikasının aparıcı ali təhsil müəssisələrindən biri Fudan Universitetinin nümayəndə heyəti ilə görüş keçirilib.

Görüşdə Fudan Universitetini təmsil edən nümayəndə heyəti, o cümlədən layihə əməkdaşlığı qrupunun  rəhbəri Tian Xiaohong, Layihə əməkdaşlıq qrupu rəhbərinin müavini Miao Miao, süni intellekt üzrə ekspert Ye Suli, biotibb üzrə ekspert He Nan, xarici əlaqələr üzrə məsul şəxs və rus dili üzrə tərcüməçi Wang Jingchun iştirak ediblər. Xəzər Universitetini isə universitetin təsisçisi, Direktorlar və Qəyyumlar Şurasının sədri Prof. Akad. Hamlet İsaxanlı, rektor Dr. Raziyə İsayeva, Tədris işləri üzrə prorektor Prof. Məhəmməd Nuriyev, fakültə dekanları və Beynəlxalq əlaqələr şöbəsinin əməkdaşları təmsil ediblər.

Qonaqları Xəzər Universitetində görməkdən məmnunluğunu ifadə edən  Dr. Raziyə İsayeva bildirib ki, ölkələrarası dostluğa əsaslanan münasibətlər iki ölkə arasında təhsil və elm sahəsində əməkdaşlığın uğurla inkişafında mühüm rol oynayır. Görüş zamanı Xəzər Universiteti haqqında ətraflı məlumat təqdim edən rektor  universitetin Çin ali təhsil müəssisələri ilə əməkdaşlığın genişləndirilməsinə xüsusi önəm verdiyini vurğulayıb.

Müzakirələr zamanı mühəndislik, süni intellekt, biotexnologiya, enerji və dayanıqlı inkişaf sahələrində birgə layihələrin həyata keçirilməsi, həmçinin akademik və elmi əlaqələrin daha da inkişaf etdirilməsi məsələləri ətrafında fikir mübadiləsi aparılıb. Görüş çərçivəsində iki universitet arasında əməkdaşlıq imkanları, tələbə və akademik heyət üçün mübadilə proqramları, birgə elmi tədqiqatlar, ikili diplom proqramları və əlaqələrin gücləndirilməsi istiqamətində perspektivlər müzakirə olunub.

Görüşün sonunda Xəzər Universiteti ilə Fudan Universiteti arasında anlaşma memorandumları imzalanıb. Tədbir çərçivəsində qarşılıqlı hədiyyələr təqdim olunub və xatirə şəkilləri çəkilib.