Bakı Şəhər Baş Polis İdarəsinin Yetkinlik Yaşına Çatmayanlarla Profilaktiki İşin Təşkili Bölməsinin (YYÇPİTB) təşkilatçılığı ilə 2025-ci il dekabrın 16-da Bakının Xətai rayonu ərazisində yerləşən 138 saylı tam orta məktəbdə “Narkomaniyaya yox deyək” mövzusunda maarifləndirici seminar keçirilib.

Tədbirdə Xəzər Universitetinin Psixologiya departamentinin əməkdaşı, Xəzər Psixoloji Xidmət Mərkəzinin psixoloqu Mirsadiq Muxtarov çıxış edərək, maddə asılılığının zərərləri, habelə psixoloji aspektləri barədə məlumat verib. O, maddə asılılığının fərdlərin psixoloji rifahına, sosial münasibətlərinə və gələcək həyat perspektivlərinə mənfi təsirlərini vurğulayaraq, asılılığın yaranma səbəbləri və müalicə yolları haqqında müasir yanaşmaları diqqətə çatdırıb.. Eyni zamanda, maddə asılılığının yeniyetmələrin emosional inkişafına və sosial adaptasiyasına yaratdığı risklər qeyd olunub.

Tədbirdə Bakı şəhər Baş Polis İdarəsi YYÇPİTB-nin  rəisi - polis polkovniki İbrahim İsmayılov, baş inspektoru - polis mayoru Asim Babaxanov, inspektoru - polis baş leytenantı Aysel Hacıyeva, Xətai Rayon Polis İdarəsi YYÇPİTB-nin rəisi - polis mayoru Tural Şahbazov, inspektoru - polis kapitanı Aygül Uluxanlı və Bakı Şəhəri Narkoloji Mərkəzinin narkoloq həkimi Günay Əsgərova iştirak etmişlər.

Tədbir şagird və müəllim heyətinin fəal iştirakı ilə interaktiv şəkildə keçirilmiş, mövzu ətrafında geniş fikir mübadiləsi aparılmış və suallar cavablandırılmışdır.