Xəzər Universitetinin Humanitar, təhsil və sosial elmlər fakültəsinin Tarix-coğrafiya müəllimliyi ixtisasının birinci kurs tələbələri “Arxeologiya və Etnoqrafiyanın əsasları” fənni çərçivəsində 2025-ci il dekabrın 17-də AMEA Arxeologiya və Antropologiya İnstitutunun Muzey-Sərgi Zalına, həmçinin İçərişəhərdə Şirvanşahlar Sarayı Kompleksinə tədris səfəri ediblər.

Muzey-Sərgi Zalında fənn müəllimi, AMEA Arxeologiya və Antropologiya İnstitutunun “Elmi ekspozisiyasının təşkili” şöbəsinin müdiri Orxan Zamanov tərəfindən tələbələrə erkən dəmir dövrü, antik dövr və orta əsrlər mərhələləri üzrə arxeoloji materiallar və maddi-mədəniyyət nümunələri haqqında ətraflı məlumat verilmişdir. Erkən dəmir dövrünü təmsil edən eksponatlar sırasında dəmirdən hazırlanmış silahlar, təsərrüfat alətləri və digər metal əşyalar nümayiş etdirilib.

Orta əsrlərə həsr olunmuş ekspozisiyada Azərbaycan ərazisində İslam mədəniyyəti və arxeologiyasına aid maddi-mədəni irsin zənginliyi vurğulanıb, elmi tədqiqatlardan bəhs edilmişdir.

Tədris proqramının davamı olaraq tələbələr İçərişəhərdəki Şirvanşahlar Sarayı Kompleksinə də ekskursiya ediblər. Burada tələbələr üçün ayrılmış xüsusi bələdçi saray ansamblının memarlıq xüsusiyyətləri, kompleksin müdafiə sistemi və şəhərin Şirvanşahlar dövrü haqqında geniş məlumat verilib. Saray ansamblının son orta əsrlərə aid memarlıq elementləri, onların funksiyaları və tarixi əhəmiyyəti tələbələrə əyani şəkildə izah edilib.

Səfər Azərbaycanın maddi-mədəni irsinin əsas mərhələlərinin yerində araşdırılması baxımından böyük əhəmiyyət kəsb edib