Xəzər Universiteti İngilis dili və ədəbiyyatı departamentinin professoru, pedaqoji elmlər doktoru Prof E.  İsmayılov 2025-ci il dekabrın 8-12-də Erasmus+ Proqramı çərçivəsində Türkiyənin Bartın Universitetinə (BARU) akademik mobillik səfərində olmuşdur.

Səfər zamanı universitet rəhbərliyi, Təhsil fakültəsinin akademik heyəti və Erasmus+ Ofisinin nümayəndələri ilə bir sıra görüşlər keçirilmiş, onların dəstəyi proqramın səmərəli təşkili və icrasında mühüm rol oynamışdır.

Akademik əməkdaşlığın perspektiv istiqamətləri üzrə türk həmkarlarla - Təhsil Fakültəsinin dekanı, Prof. Dr. Çetin Semerci, dekan müavini, Dos. D.r Emrullah Yılmaz, İngilis dili kafedrasının müdiri, assistent Prof.Dr. Erdi Şimşek, Erasmus+ Proqramının koordinatoru, Təhsil elmləri kafedrasının müəllimi, assistent Prof. Dr. Ahmet Yirmibeş, Təhsil elmləri kafedrasının müəllimi assistent Prof.Dr. Neslihan Köse, İngilis dili kafedrasının müəllimi, assistent Prof.Dr.  Burcu Ak, Erasmus Ofisinin mütəxəssisi müəllim Murat İpek və Erasmus Ofisinin mütəxəssisi Dr. Esra Eroğuz Çoban ilə konstruktiv müzakirələr aparılmışdır.

Müzakirələr qarşılıqlı akademik maraq doğuran bir sıra sahələri əhatə etmişdir. Bunlara magistratura və doktorantura səviyyəsində tədqiqatçı kadrların hazırlanması, ESP/EAP üzrə magistr və doktorantlara dərs deyilməsi üçün effektiv metodologiyaların birgə işlənib hazırlanması, eləcə də akademik kadr hazırlığı üzrə beynəlxalq sistemlərin müqayisəli təhlili daxildir.

Akademik proqram çərçivəsində Prof. İsmayılov tələbələr üçün İsveçin icbari və yuxarı orta təhsil sistemlərinə həsr olunmuş mühazirə oxumuşdur. O, həmçinin, Fin və Türkiyə orta təhsil sistemlərinin müqayisəsinə dair tələbə təqdimatı zamanı ekspert-müzakirəçi qismində çıxış etmiş, müqayisəli pedaqogika sahəsindəki geniş təcrübəsinə əsaslanaraq, dəyərli rəylər vermişdir. Müzakirələr Kumluca kəndində yerləşən orta məktəbin direktoru  Fuat Aydoğmuş`un iştirakı ilə daha da zənginləşmişdir.

Məktəb direktorunun dəvəti ilə Prof. İsmayılov sonradan Kumluca məktəbinə getmiş, müəllim kollektivi ilə görüşmüş və şagirdlər üçün Azərbaycan və Rusiyanın ümumi orta təhsil sistemlərinə dair qısa təqdimatla çıxış etmişdir.

BARU Kitabxanasına səfər zamanı o, digər akademik resurslarla yanaşı, 2024-cü ilin dekabr ayından nəşr edilən illik ikidilli (türk və ingilis dillərində) Istanbul Education Journal adlı elmi dergisi ilə tanış olmuşdur. Bu münasibətlə türk həmkarlar azərbaycanlı pedaqoqları jurnalda elmi məqalələrini dərc etdirməyə dəvət etmişlər.