Dilçilik və onomastika sahəsində nüfuzlu beynəlxalq tədbirlərdən olan “4-cü Uluslararası Ad Bilimi Bilgi Şöləni” 2025-ci il dekabrın 16-17-də Türk Dil Kurumu (TDK) tərəfindən Ankarada keçirilib. Atatürk Kültür, Dil və Tarix Yüksək Qurumunun Bilkənd ərazisində təşkil olunan tədbirə müxtəlif ölkələrdən alim və mütəxəssislər qatıldı. Açılış mərasimi “2025-ci il Türk dilinə xidmət mükafatları”nın təqdimatı ilə birgə baş tutub və yüksək səviyyəli rəsmi şəxslər, akademiklər və diplomatik nümayəndələr iştirak ediblər.

Şölənin əsas məqsədi ad bilimi sahəsində beynəlxalq əməkdaşlığı gücləndirmək, adlandırma prosesinin müxtəlif aspektlərini müzakirə etmək və ortaq elmi yanaşmalar formalaşdırmaq idi. Tədbirdə Türk dillərinin ad ənənələri və ümumi onomastik mədəniyyət mövzularına xüsusi diqqət yetirildi.

Xəzər Universiteti bu mötəbər elmi toplantıda Dillər və ədəbiyyatlar departamentinin əməkdaşları – Dos. Zivər Hüseynli Baylan və filologiya üzrə fəlsəfə doktoru Almaz Bədəlova ilə təmsil olundu. Zivər Hüseynli Baylan Səfəvilər dövrü mənbələri əsasında türk mənşəli feili antroponimləri tarixi-linqvistik baxımdan təhlil etdi. Almaz Bədəlova isə İrəvan xanlığı toponimlərinin türk mənşəyini tarixi və dil faktları ilə əsaslandıraraq, onların türk dünyasının ortaq yaddaşındakı yerini vurğuladı.

Xəzər Universiteti əməkdaşlarının məruzələri maraqla qarşılandı və fəal elmi müzakirələrə səbəb oldu. Bu çıxışlar Azərbaycan onomastikasının beynəlxalq səviyyədə tanıdılmasına mühüm töhfə kimi qiymətləndirildi.

Tədbirin sonunda iştirakçılara sertifikatlar təqdim olundu. Eyni zamanda, Xəzər Universitetinin nümayəndələri TDK-nın sədri Prof. Dr. Osman Mert ilə görüşərək, gələcək elmi əməkdaşlıq imkanlarını müzakirə etdilər. TDK tərəfindən nəşr olunan elmi vəsaitlərin Xəzər Universitetinin kitabxanasına hədiyyə ediləcəyi də bildirildi ki, bu təşəbbüs universitetin elmi-tədqiqat potensialının gücləndirilməsinə xidmət edəcək.