Xəzər Universitetinin Kitabxana-İnformasiya Mərkəzində 2025-ci il dekabrın 17-də Hüquq və İnsan Haqları İnstitutunun İdarə Heyəti sədrinin müavini, hüquq üzrə fəlsəfə doktoru Vəfaddin İbayevin “Suverenliyin zəfər yolu: reallaşan ideyalar, hüquqi əsaslar, siyasi paralellər” adlı kitabının təqdimatı keçirilmişdir.

Tədbiri giriş sözü ilə Kitabxana-İnformasiya Mərkəzinin direktoru Aytac Misgərli açaraq, kitabın elmi və ictimai əhəmiyyətindən bəhs etmiş, müasir dövrdə suverenlik anlayışının hüquqi-siyasi kontekstdə araşdırılmasının aktuallığını vurğulamışdır.

 Xəzər Universitetinin Tarix və arxeologiya departamentinin müdiri, Dos. Telman Nüsrətoğlu çıxışında suverenlik ideyasının tarixi inkişaf mərhələlərini sistemli şəkildə təhlil etmiş, tarixi faktlarla müasir siyasi proseslər arasında əlaqələri açıqlamışdır.

Siyasi elmlər və fəlsəfə departamentinin müdiri Dos. Orxan Vəliyev  suverenliyimizə gedən yolda baş verən siyasi prosesləri və beynəlxalq arenada Azərbaycanın müstəqil dövlət kimi tanınmasında göstərilən səyləri nəzərə çatdırmışdır. 

Tədbirin əsas məruzəçisi – kitabın müəllifi Vəfaddin İbayev əsərin məzmunu haqqında geniş və ətraflı məlumat vermişdir. Müəllif kitabda dövlət suverenliyinin formalaşması, möhkəmlənməsi və beynəlxalq hüquq çərçivəsində tanınması məsələlərinin elmi əsaslarla araşdırıldığını, xüsusilə müasir Azərbaycan dövlətçiliyinin hüquqi-siyasi inkişaf yolunun təhlil olunduğunu diqqətə çatdırmışdır. O, həmçinin əsərdə konstitusion prinsiplər, beynəlxalq hüquq normaları və siyasi təcrübə arasında qarşılıqlı əlaqələrin sistemli şəkildə izah olunduğunu qeyd etmişdir.

Təqdimat mərasimi elmi diskussiya mühitində keçmiş, tədbir iştirakçıları kitabın hüquq, siyasi elmlər və tarix sahələri üzrə tədqiqatçılar üçün mühüm elmi mənbə olduğunu vurğulamışlar.