Humanitar elmlər, təhsil və sosial elmlər fakültəsinin dekanı Dr. Milana Abbasova, Beynəlxalq əlaqələr şöbəsinin müdiri Dr. Firuz Süleymanov və ABŞ Fulbrayt qrant sahibi Maykl Sipper 2025-ci il dekabrın 10-da ABŞ-ın Azərbaycandakı səfirliyinin  "Şirvanşah" Muzey-Restoranda keçirilən Şükran / Milad şam yeməyinə dəvət olunublar.

Şam yeməyi  səfirliyin İctimaiyyətlə əlaqələr üzrə müşaviri Maykl Haket`in açılış sözləri ilə başlayıb. O,  ABŞ və Azərbaycan arasında ikitərəfli əlaqələrin əhəmiyyətini vurğulayıb və xüsusilə ABŞ Fulbrayt Proqramı kimi təhsil mübadiləsi proqramlarının qarşılıqlı anlaşma və əməkdaşlığın yaradılmasında oynadığı mühüm rolu qeyd edib.

Şam yeməyi ərzində Xəzər Universitetinin əməkdaşları ABŞ səfirliyinin nümayəndələri, digər Fulbrayt qrant sahibləri və onların ev sahibi müəssisələrindən olan professor-müəllim heyəti ilə əlaqələr qurmaq imkanı əldə ediblər.

ABŞ səfirliyinin İngilis dili proqramları üzrə koordinatoru Səbinə Abdullayeva, Mədəni əlaqələr üzrə məsul Rendi Koul, İnformasiya proqramları üzrə direktor Aydan Əsgərova və İctimaiyyətlə əlaqələr üzrə müşavir Maykl Haket`lə müzakirələr aparılıb. ABŞ ilə Azərbaycan arasında təhsil və mədəni əlaqələrin daha da möhkəmləndirilməsi öhdəlikləri bir daha nəzərə çatdırılıb.