Xəzər Universitetinin Dillər və ədəbiyyatlar departamentində 2025-ci il dekabrın 12-də Çin dili müəllimi f.ü.f.d. Nərgiz Kərimovanın təqdimatında “Azərbaycan ədəbiyyatında Çin mənşəli arxetip və obrazlar” mövzusunda elmi seminar təşkil olunub.

Tədbirdə universitetin rektoru, professor-müəllim heyəti, tədqiqatçılar və tələbələr iştirak ediblər. Nərgiz Kərimova çıxışında arxetiplər nəzəriyyəsinin əsas məqamlarına toxunaraq, Çin  mənşəli arxetip və obrazların Azərbaycan ədəbiyyatındakı təzahür formalarını və qarşılıqlı əlaqə mexanizmlərini geniş şəkildə şərh edib. O, həmçinin arxetiplərin müasir humanitar elmlərin ən aktual tədqiqat istiqamətlərindən biri olduğunu vurğulayıb.

Seminarda Çin ədəbiyyatından seçilmiş nümunələr orijinal mənbələr əsasında müqayisəli şəkildə təhlil edilib, arxetiplərin öyrənilməsinə dair yeni elmi yanaşmaların mümkün təsirləri müzakirə olunub.

Tədbir interaktiv müzakirələrlə davam edib. İştirakçılar mövzu ilə bağlı suallar ünvanlayaraq, fəal elmi dialoq mühiti yaradıblar. Seminar iştirakçılar tərəfindən böyük maraqla qarşılanıb və məhsuldar elmi fikir mübadiləsi platforması kimi dəyərləndirilib.