Xəzər Universitetinin Kitabxana - İnformasiya Mərkəzi (KİM) və “Dünya” məktəbi kitabxanasının təşkilatçılığı ilə 2025-ci il dekabrın 11-də “Crescent Mall” Ticarət Mərkəzindəki “Əli və Nino” Kitab Evində  Xəzər Universitetinin təsisçisi, Direktorlar və Qəyyumlar Şurasının sədri, fizika-riyaziyyat elmləri doktoru, şair, yazıçı, publisist, tərcüməçi, beynəlxalq aləmdə  polimat (çoxbilgin) kimi tanınan Prof.Akad. Hamlet İsaxanlının kitablarının imza günü keçirildi. Tədbirdə universitetin rəhbərliyi və əməkdaşları, Milli Məclisin üzvləri, tanınmış ədiblər, oxucular iştirak edirdilər.

İmza gününə H. İsaxanlının indiyədək müəllifi olduğu 25 kitab, o cümlədən “Əlkimya: elm, sənət və mistika”, “Mənim Qarabağım və ya Qarabağ düyünü”, “Bu da bir həyatdı” "Xəzər"in sorağında”, “Dördlüklər”, “Təzadlar”, “Şerə dönən duyğular” (fars dilində), “Şeirlər toplusu” (Çin dilində),.”Hazana övgü” (Türkiyə türkcəsində) və digərləri çıxarılmışdı.  Sərgidə isə əlavə olaraq onun həmmüəllifi, məqalə, fəsil müəllifi, tərcüməçisi, redaktoru olduğu daha 60 kitab nümayiş olunurdu.

Tədbirdən əvvəl Xəzər Universiteti Musiqi və incəsənət departamentinin müdiri, əməkdar  müəllim, tanınmış pianoçu Zülfiyyə Sadıqovanın rəhbərliyi ilə universitetin Kamera orkestri konsert proqramı ilə çıxış etdi.

Tədbirin aparıcısı, “Dünya məktəbi” kitabxanasının direktoru Dr. Mədinə Karahan iştirakçıları salamlayaraq, natiqlərə söz verdi.

Filologiya elmləri doktoru, Əməkdar elm xadimi, professor Qəzənfər Paşayev, yazıçı Seyran Səxavət, Milli Məclisin üzvləri Cavanşir Feyziyev və Ceyhun Məmmədov, Azərbaycan Yazıçılar Birliyinin Güney Azərbaycan Şöbəsinin rəhbəri, Azərbaycan Yazıçılar Birliyi sədrinin müşaviri, Güney Azərbaycan İcmasının təsisçisi və sədri şair Sayman Aruz, filologiya elmləri doktoru, AMEA Nizami Gəncəvi adına Ədəbiyyat İnstitutunun Azərbaycan-Asiya ədəbi əlaqələri şöbəsinin müdiri Prof. Bədirxan Əhmədov, Elm və Ali Təhsil üzrə Dövlət Agentliyinin Sabah qrupları İcra Komitəsinin rəhbəri Elza Səmədova və Xəzər Universiteti İngilis dili və ədəbiyyatı departamentinin baş müəllimi Firəngiz Nəsirova çıxış etdilər.

Çıxışlarda Prof.Akad. Hamlet İsaxanlı görkəmli riyaziyyatçı alim, Azərbaycanda ilk  özəl universitetin, “Dünya” məktəblər şəbəkəsinin qurucusu olaraq uğurlu təhsil təşkilatçısı, elm, mədəniyyət və təhsil tarixi üzrə mütəxəssis. ədəbiyyat və dilçilik, tarix və fəlsəfəyə dair çoxsaylı əsərlərin müəllifi kimi səciyyələndirilərək, çoxşaxəli fəaliyyətinin müxtəlif nümunələrindən konkret əsərlərə istinadla bəhs etdilər.

Xəzər Universitetində təhsil alan çinli tələbələr Hamlet İsaxanlının “Sən sevdiyin bir gənc idi” adlı şeirini Azərbaycan dilində söylədilər.

Sonra Prof.Akad. Hamlet İsaxanlıya söz verildi. O, yaradıcılıq təcrübəsindən, iş üsulundan danışdı. Tədbirin təşkilatçılarına, iştirakçılara, çıxış edərək onun yaradıcılığını yüksək dəyərləndirən görkəmli ziyalılara dərin təşəkkürünü bildirdi.

Sonda Prof.Akad. Hamlet İsaxanlı oxucular üçün kitablarını imzaladı.  Sərgidə nümayiş olunan kitablar iştirakçılara hədiyyə edildi.