Xəzər Universiteti Siyasi elmlər və fəlsəfə departamentinin müdiri Dos. Orxan Vəliyev 2025-ci il dekabrın 10-da Ankarada Hacettepe Universiteti və Ankara Hacı Bayram Veli Universitetində Beynəlxalq Münasibətlərin Təhlili Mərkəzinin (Bakıda fəaliyyət göstərən təsisat - BMTM) həmtəşkilatçılığı ilə keçirilən “Azərbaycanın Türk Dövlətləri Təşkilatına sədrliyi və Türk dünyasının gələcəyi” adlı paneldə iştirak etmişdir.

Hacettepe Universitetində baş tutan tədbirdən əvvəl nümayəndə heyəti Azərbaycan Respublikasının Türkiyədəki Fövqəladə və səlahiyyətli səfiri Dr. Rəşad Məmmədovun rəhbərliyi ilə universitetin rektoru Prof. Mehmet Cahit Güran ilə görüşmüşdür. Rektorluqda keçən səmimi səhbətdən sonra səfir Dr. Rəşad Məmmədov tədbirdə açılış nitqi ilə çıxış etmişdir.

Hacettepe Universitetindəki proqram başa çatdıqdan sonra panelin növbəti hissəsi Ankara Hacı Bayram Veli Universitetində, həmin universitetin və Ankara Gaspıralı Xarici Siyasət İnstitutunun Beynəlxalq Münasibətlərin Təhlili Mərkəzinin birgə təşkilatçılığı ilə davam etmişdir. Tədbirdə diplomatlar, siyasi partiya nümayəndələri, ekspertlər və tələbələr iştirak etmişlər. Panel mərasimi şəhidlərin xatirəsinə bir dəqiqəlik sükut, həmçinin Azərbaycan və Türkiyə himnlərinin ifası  ilə açılmışdır.

Sonra Ankara Hacı Bayram Veli Universitetinin prorektoru Prof. Hülya Bayraktar və Azərbaycan Respublikasının Türkiyədəki Fövqəladə və səlahiyyətli səfiri Dr. Rəşad Məmmədov çıxış etmişlər. Daha sonra Dr. Kadir Ertaç Çelikin moderatorluğu ilə panel müzakirələri başlayıb. Paneldə BMTM İdarə heyətinin üzvü Dr. Cavid Vəliyev, Azərbaycan Dövlət İqtisad Universitetinin müəllimi Dos. Nazim Cəfərov, Ankara Hacı Bayram Veli Universitetinin dekanı Prof. Fırat Purtaş, Gaspıralı Xarici Siyasət İnstitutunun direktoru Dos. Esma Özdaşlı, Ankara Hacı Bayram Veli Universitetinin müəllimi Dos. Levent Ersin Orallı və Xəzər Universitetindən departament müdiri Dos. Orxan Vəliyev məruzə etmişlər.

Dos. Orxan Vəliyev paneldə “İkinci Qarabağ Zəfəri sonrası Azərbaycan - Türkistan əlaqələri” mövzusundakı məruzəsində regionda formalaşan yeni geosiyasi reallıqlar, Türk dövlətləri arasında inteqrasiya dinamikası və gələcək əməkdaşlıq istiqamətlərindən bəhs etmişdir. Auditoriyanın sualları əsasında müzakirələr aparılmışdır.

Tədbirin sonunda iştirakçılara xatirə hədiyyələri təqdim edilmiş, panel iştirakçıları ilə birlikdə xatirə şəkilləri çəkilmişdir.