2025-ci il  dekabrın 9-da Xəzər Universitetinin Karyera və Məzunlar Mərkəzinin təşkilatçılığı ilə Azərbaycan Respublikasının Prezidenti yanında Antiinhisar və İstehlak Bazarına Nəzarət Dövlət Agentliyinin (AİBNDA) nümayəndələrinin iştirakı ilə İqtisadiyyat və menecment fakültəsinin tələbələri üçün “İstehlakçıların əsas hüquqları və onların müdafiəsi mexanizmləri” mövzusunda seminar keçirildi.

Tədbirin əsas məqsədi tələbələrin istehlak bazarı, antiinhisar siyasəti, istehlakçı hüquqlarının qorunması və bu sahədə fəaliyyət göstərən dövlət mexanizmləri barədə məlumatlandırılması idi.

Görüşdə agentliyin nümayəndələri - İstehlak bazarına nəzarət şöbəsinin müdiri Yusif Tapdıqlı, İstehlakçı hüquqlarının müdafiəsi şöbəsinin müdiri, Xəzər Universitetinin məzunu Elşən Cəfərov AİBNDA-nın əsas fəaliyyət istiqamətləri, istehlak bazarına nəzarət mexanizmləri, mövcud qanunvericilik aktları və istehlakçıların hüquqlarının müdafiəsi sahəsində həyata keçirilən tədbirlər haqqında geniş məlumat verdilər.

Mühazirə zamanı ölkədə rəqabət mühitinin qorunması, istehlak bazarında şəffaflığın artırılması, haqsız rəqabət hallarının qarşısının alınması və istehlakçıların hüquqi maarifləndirilməsi istiqamətində həyata keçirilən tədbirlər tələbələrin nəzərinə çatdırıldı. Həmçinin, real nümunələr əsasında istehlakçı hüquqlarının pozulması halları və onların həll mexanizmləri müzakirə olundu.

Seminar interaktiv müzakirə formatında davam etdi. Tələbələrin sualları cavablandırıldı, onlara istehlakçı kimi hüquqlarını daha səmərəli şəkildə necə qorumaq barədə praktiki tövsiyələr verildi.