Bakı Dövlət Universitetinin (BDU) təşkilatçılığı ilə dekabrın 4-5-də Xalq şairi Zəlimxan Yaqubun 75 illik yubileyinə həsr olunmuş "Azərbaycanda elm, təhsil və mədəniyyətin inteqrasiyalı inkişafında informasiya mühitinin rolu" mövzusunda respublika elmi konfransı keçirilib.

BDU-da baş tutan açılışdan sonra AMEA Nizami Gəncəvi adına Ədəbiyyat İnstitutunda bölmə iclası keçirilib. Universitetin İnformasiya və sənəd menecmenti fakültəsinin dekanı fil.f.d. Ələmdar Bayramlı və Ədəbiyyat İnstitutunun Elmi işlər üzrə direktor müavini, fil.f.d., Dos. Mehman Həsənlinin sədrlik etdiyi bölmə iclasında Xəzər Universitetinin magistrantları Sahibə Şirinova və Zəhra Rzazadə də elmi tədqiqatlarının bir hissəsini təşkil edən məqalələrini təqdim ediblər.

Sahibə Şirinova "Azad Qaradərəlinin nəsrində Qarabağ müharibəsi mövzusunun əksi" adlı məruzəsində yazıçının yaradıcılığında Qarabağ müharibəsi mövzusunun işlənmə xüsusiyyətlərini təhlil edib. Zəhra Rzazadə isə "Arif Ərdəbilinin “Fərhadnamə” poemasında Fərhad obrazının yeni qəhrəman modeli" mövzusunda çıxış edərək, klassik Fərhad obrazının Arif Ərdəbili tərəfindən yenidən təqdim olunma xüsusiyyətlərini diqqətə çatdırıb.

Bölmə iclasının sonunda Mehman Həsənli tərəfindən məruzəçilərə sertifikat təqdim olunub.