Xəzər Universiteti Siyasi elmlər və fəlsəfə departamentinin müdiri Dos. Orxan Vəliyev
2025-ci il dekabrın 9-da Ankara Sosial Elmlər Universitetində keçirilən “Azərbaycanın Türk Dövlətləri Təşkilatına Sədrliyi və Türk Dünyasının Gələcəyi” adlı paneldə məruzə ilə çıxış etmişdir. Tədbir Azərbaycandan Beynəlxalq Münasibətlərin Təhlili Mərkəzi və Türkiyənin Ankara Sosial Elmlər Universitetinin birgə təşkilatçılığı ilə baş tutmuşdur. Paneldə diplomatlar, siyasi partiya nümayəndələri, elm adamları, ekspertlər və tələbələr iştirak etmişdir. Panel şəhidlər üçün sayğı duruşu və hər iki ölkənin himnlərinin səsləndirilməsi ilə açılmışdır.
Panel Azərbaycan Respublikasının Türkiyədəki fövqəladə və səlahiyyətli səfirinin müşaviri Dr. Füzuli Məcidli, Ankara Sosial Elmlər Universitetinin prorektoru Prof. Yasin Söyler və Ankara Əhməd Cavad İnstitutunun direktoru Prof. Ruhi Ərsoy`un açılış nitqləri ilə davam etmişdir.
Sonra Prof. Elem Eyrice Tepeciklioğlu`nun moderatorluğu ilə panel müzakirələri aparılmışdır. Tədbirdə Beynəlxalq Münasibətlərin Təhlili Mərkəzinin idarə heyətinin üzvü Dr. Cavid Vəliyev, Xəzər Universitetindən Dos. Orxan Vəliyev və Azərbaycan Dövlət İqtisad Universitetindən Dos. Nazim Cəfərov məruzələrlə çıxış etmişlər.
Dos. Orxan Vəliyev paneldə “İkinci Qarabağ Zəfəri Sonrası Azərbaycan - Türkistan Əlaqələri” mövzusunda geniş məruzə təqdim edərək, regionda dəyişən geosiyasi reallıqlar və inteqrasiya perspektivləri barədə fikir mübadiləsi aparmışdır. O, Azərbaycanın 44 günlük Vətən müharibəsindəki qələbəsindən sonra bölgədə yaranmış yeni imkanlara toxunaraq, Türk dünyasının inkişaf perspektivləri və TDT-nin qarşısında duran ümumi çağırışlarla bağlı fikirlərini bölüşmüşdür. Panel sualların cavablandırılması ilə davam etmişdir.
Tədbir iştirakçılara hədiyyələrin təqdim edilməsi və xatirə şəkillərinin çəkilməsi ilə yekunlaşmışdır.
Panel Azərtac tərəfindən işıqlandırılmışdır.
Copyright © Xəzər Universiteti, 2026
Facebook 
Instagram 
X 
LinkedIn 
Telegram 
YouTube