Pakistanın Quaid-i-Azam Universitetinin (QAU) Mikrobiologiya departamentinin rəhbəri, Tədqiqat, İnnovasiya və Kommersiyalaşdırma İdarəsinin (ORIC – Office of Research, Innovation, and Commercialization) direktoru Prof. Dr. Muhammad Ishtiaq Ali 2025-ci il dekabrın 5-də Xəzər Universitetində olaraq,  Həyat elmləri departamentinin müdiri Dr. Cəmalə Eldarova və departamentin dosenti Dr. Cavid Ocaqi ilə görüşmüşdür.  

Görüş zamanı iki ali təhsil müəssisəsi arasında potensial əməkdaşlıq istiqamətləri geniş müzakirə olunmuş, o cümlədən birgə elmi konfransların təşkili, təlim kurslarının keçirilməsi, ortaq tədqiqat layihələrinin hazırlanması və birgə elmi rəhbərlik proqramlarının icrası imkanları nəzərdən keçirilmişdir. Həmçinin, tələbə və müəllim mübadiləsi, laboratoriya infrastrukturunun birgə istifadəsi və gələcəkdə institutlararası konsorsiumların yaradılması kimi əlavə əməkdaşlıq perspektivləri də diqqət mərkəzində olmuşdur.

Qeyd etmək lazımdır ki, Quaid-i-Azam Universiteti Pakistanın nüfuzlu dövlət universitetlərindən biri olmaqla yanaşı, beynəlxalq akademik aləmdə də tanınır. Universitet 2025-ci il QS Dünya Universitetləri Reytinqində 354-cü yer ilə regionun ən güclü tədqiqat yönümlü ali təhsil müəssisələri sırasında qərarlaşıb.