Xəzər Universitetinin təşkilatçılığı ilə 2025-ci il dekabrın 7-də  universitetin birinci kurs əcnəbi tələbələrinin və akademik heyətinin iştirakı ilə Quba rayonunun məşhur Məstərgah kəndinə mədəni-inteqrasiya səfəri təşkil olunub.  Səfərdə universitetin təsisçisi, Direktorlar və Qəyyumlar Şurasının sədri  Prof. Akad. Hamlet İsaxanlı, rektoru Dr. Raziyə İsayeva, fakültə dekanları və Beynəlxalq əlaqələr şöbəsinin əməkdaşları  iştirak ediblər

Səfərin əsas məqsədləri əcnəbi tələbələrin bir-birləri və yerli tələbələrlə qarşılıqlı inteqrasiyasını gücləndirmək, onlar arasında mədəniyyətlərarası ünsiyyəti və əlaqə qurma imkanlarını inkişaf etdirmək, eyni zamanda Azərbaycan xalqının zəngin dilini, adət-ənənələrini və mədəni irsini tanıtmaq olub. Bu təşəbbüs Xəzər Universitetinin beynəlmiləlləşdirmə strategiyasının tərkib hissəsi kimi, müxtəlif ölkələrdən olan tələbələrin sosial adaptasiyasına və akademik mühitə daha rahat inteqrasiyasına xidmət edir.

Tədbir Prof.Akad. Hamlet İsaxanlının səmimi nitqi ilə başlayıb. O, universitetin beynəlxalq tələbələr üçün yaratdığı çoxmədəniyyətli mühitin əhəmiyyətini vurğulayaraq, bu kimi səfərlərin Azərbaycan mədəniyyətinin dünyaya tanıdılması baxımından mühüm rol oynadığını qeyd edib. Xəzər Universitetinin rektoru Dr. Raziyə İsayeva çıxış edərək, əcnəbi tələbələrin ölkəmizdəki təhsil həyatına adaptasiyasını dəstəkləyən bütün bu təşəbbüslərin universitetin prioritet istiqamətlərindən biri olduğunu bildirib.

Proqram çərçivəsində əcnəbi tələbələr öz milli musiqi və rəqs nümunələrini təqdim edərək, müxtəlif ölkələrin mədəniyyətlərinin bir araya gəldiyi rəngarəng bir atmosfer yaradıblar. Bununla yanaşı, Azərbaycan mədəni irsinin təbliği məqsədilə universitetin müəllimi, aşıq Ramin Bayramovun ifasında müxtəlif saz havaları səsləndirilib, tələbələr üçün Azərbaycan folkloru haqqında interaktiv təqdimatlar keçirilib.

Tədbirin sonunda tələbələrin iştirakı ilə müxtəlif əyləncəli oyunlar təşkil olunub, xatirə fotoları və videoçəkilişlər aparılıb. Səfər iştirakçılar tərəfindən ruh yüksəkliyi ilə qarşılanıb və onların Azərbaycana və Xəzər Universitetinə bağlılığını daha da artırıb.

Bu cür mədəni səfərlər Xəzər Universitetinin beynəlxalq tələbələrə göstərdiyi diqqət və dəstəyin, eyni zamanda universitetin çoxmədəniyyətli və açıq təhsil mühiti formalaşdırmaq istiqamətindəki davamlı fəaliyyətinin bariz nümunəsidir.