2025-ci il noyabrın 15-də “50-ci ICPC – Universitetlərarası Beynəlxalq Proqramlaşdırma Müsabiqəsi”nin Azərbaycan üzrə regional mərhələsi keçirilib. Müsabiqə ICPC Azərbaycan İcması, Azərbaycan Texniki Universiteti və ADA Universitetinin təşkilatçılığı, İnnovasiya və Rəqəmsal İnkişaf Agentliyinin tərəfdaşlığı ilə həyata keçirilib. Regional mərhələ Azərbaycan Texniki Universitetinin texniki bazasında təşkil olunub.

Bu ilki yarışda Azərbaycanın 20 ali təhsil müəssisəsindən ümumilikdə 52 komanda (3 tələbə + 1 komanda rəhbəri) iştirak edib. Bundan əlavə, müsabiqədən kənar 3 məktəblilər komandası da prosesə qoşulub.

Komandaların qarşısına 5 saat ərzində 12 alqoritmik məsələnin C++, Java və ya Python dillərində həll edilməsi və həllərin avtomatik qiymətləndirmə sistemində yoxlanılması tapşırığı qoyulub.

Müsabiqənin nəticələrinə əsasən, Xəzər Universitetinin "KHAZAR U1" komandası  (Təbiət elmləri və mühəndislik fakültəsi, Kompüter elmləri ixtisası: Cavad Qurbanov, IV kurs; Hüseyn Moylayev, IV kurs; Rəsul İsmayılzadə, II kurs; komandanın mentoru: Fariz Həsənli) 52 komanda arasında 3-cü pillədə qərarlaşaraq, “50-ci ICPC – Universitetlərarası Beynəlxalq Proqramlaşdırma Müsabiqəsi”nin Dünya yarımfinalına vəsiqə qazanıb.

Ümumilikdə 21 komanda “50-ci ICPC”nin növbəti mərhələsində - Dünya yarımfinalında və Cənubi Qafqaz Açıq Çempionatında iştirak etmək hüququ əldə edib. Yarımfinal mərhələsi 15–17 dekabr 2025-ci il tarixlərində Gürcüstan Respublikasında keçiriləcək.

Qeyd edək ki, müsabiqənin Azərbaycan üzrə təsnifat mərhələsi 26 oktyabr 2025-ci il tarixində baş tutub. Bu mərhələdə 22 ali təhsil müəssisəsindən 157 komanda iştirak edib və onların 63-ü regional mərhələyə yüksəlib.

Ətraflı:

https://icpc.global/regionals/finder/Azerbaijan-Regional-2026/standings