Xəzər Universitetinin İqtisadiyyat və menecment fakültəsinin 1-ci kurs Turizm ixtisası tələbələri üçün 2025-ci il noyabrın 27-də “Mədəni irs və turizm” mövzusunda maarifləndirici görüş təşkil olunub. Tədbirdə Mədəni irs və mədəni turizm üzrə mütəxəssis Elçin Kərimov iştirak edib.

Görüş zamanı Elçin Kərimov tələbələrə yerli və beynəlxalq metodlar, mədəni irsin qorunması və istifadəsi sahəsində tətbiq olunan təcrübələr, eləcə də beynəlxalq konvensiyaların mahiyyəti barədə ətraflı məlumat verib. Təqdimat çərçivəsində Ümumdünya irs ərazisi, UNESCO-nun seçim meyarları, qorunma prinsipləri və beynəlxalq idarəetmə sistemi izah olunub.

Tələbələrə konkret misal olaraq Şəki şəhəri və Xınalıq nümunələrində Ümumdünya irs ərazilərinin dəyəri və atributları təqdim edilib.

Görüş tələbələr üçün mədəni irs və turizm sahəsində biliklərini genişləndirmək və praktiki nümunələr üzərində öyrənmək baxımından faydalı olub.