Xəzər Universitetinin Dillər və ədəbiyyatlar departamenti və Bakı Yunus Emre İnstitutunun birgə təşkilatçılığı ilə 2025-ci il noyabrın 28-də Türkiyənin Nevşehir Hacı Bektaş Veli Universitetinin professoru, tanınmış alim və şair Prof. Dr. Bayram Durbilmez`lə görüş keçirilib. Tədbir türk xalqlarının ortaq mədəni və ədəbi dəyərlərinin tələbələr arasında təbliğini gücləndirmək məqsədi daşıyıb.

Görüşü departament müdiri Dos. Dilbər Zeynalova açaraq, universitetdə türkoloji istiqamətin inkişafı və tələbələrin türk dünyasının mədəni irsi ilə yaxından tanış olması üçün görülən işlər barədə məlumat verib.

 Prof. Dr. Bayram Durbilmez “Türk birliyi kontekstində ədəb və ədəbiyyat” mövzusunda məruzə edərək, “ədəb” anlayışının türk mədəniyyətində təkcə davranış modeli deyil, həm də mənəvi kimliyi formalaşdıran fundamental dəyər olduğunu vurğulayıb. Orxon-Yenisey abidələri, klassik sufi poeziyası və müasir türk ədəbiyyatından nümunələrə əsaslanan alim ədəb konseptinin türk ədəbiyyatının bütün dövrlərində dəyişməyən estetik xətt kimi qorunduğunu qeyd edib.

 Məruzə tələbələrin böyük marağına səbəb olub. Sual-cavab hissəsində tələbələr professora müxtəlif suallar ünvanlayıb, həmçinin Könül Hüseynova, Fidan Əzimova və Nazilə Ağayeva alim-şairin müxtəlif illərdə qələmə aldığı şeirlərdən nümunələr səsləndiriblər. Alim-şair tədbirin sonunda özünün “Sürməli yarım” şeirini söyləyib.

 Görüşün sonunda Humanitar, təhsil və sosial elmlər fakültəsinin dekanı Dr. Milana Abbasova Prof. Dr. Bayram Durbilmez`ə təşəkkür plaketi verib. Professor müəllifi olduğu kitabları Dos. Dilbər Zeynalovaya universitet kitabxanası üçün hədiyyə edib.