Dünyanın aparıcı akademik çap təsisatlarından olan Niderlandın  Brill nəşriyyatında “Exploring Intersections between Nizami and Dante” (“Nizami və Dante: Kəsişmələrin Araşdırılması”) adlı yeni kitab çapdan çıxıb. Nəşrin redaktorları  Rahilya Qeybullayeva, Nunzio Ruggiero və Maria Teresa Giaveri`dir.

Kitabda Nizami Gəncəvi və Dante Aligerinin yaradıcılığı vasitəsilə İslam və Xristian sivilizasiyaları arasında mədəni, fəlsəfi və ədəbi paralellər tədqiq olunur. “Əvvəl və sonra” anlayışı üzərində qurulan yanaşma orta əsr mədəni irsinə yeni perspektiv gətirir, gözəllik, şərab, müdriklik, müqəddəs və profan ehtiras, mənəvi dəyərlər kimi orta əsr simvollarına və sevginin insan ruhundakı dəyişən roluna işıq salır.

Nəşrdə Xəzər Universitetinin təsisçisi, Direktorlar və Qəyyumlar Şurasının sədri Prof.Akad. Hamlet İsaxanlının müəllifi olduğu  “Nizami’s Philsosophy of History” (“Nizaminin Tarix Fəlsəfəsi”)  adlı 19-cu fəsil də yer alır. Prof.Akad. İsaxanlı Nizami və Dantenin əsərlərini fəlsəfi ideyalar, siyasi baxışlar və tarix düşüncəsi baxımından araşdırır. Fəsildə Nizaminin “Xosrov və Şirin” və “Yeddi Gözəl” poemalarının tarixi fiqurlarının sevgi və ədalətli hökmdar ideyası üzərində qurulduğu qeyd olunur. Nizaminin ən böyük əsəri “İskəndərnamə”nin dünya tarixi, dünya coğrafiyası və ideal hökmdar anlayışlarını əhatə etdiyi, həmçinin şairin məqsədli anaxronizmlər vasitəsilə İskəndəri real tarixi sərhədlərdən kənarda təqdim etdiyi vurğulanır.

Fəsildə, həmçinin, qeyd olunur ki, Nizami İskəndəri yeddi yunan filosofu ilə fəlsəfi söhbətlər aparan dünya hökmdarı kimi təsvir edir; bu filosoflardan yalnız biri onun real müasiri olub. Bu yaradıcı yanaşma Dante ilə müqayisədə təhlil edilərək, orta əsr tarixi yaddaşının formalaşması haqqında yeni baxış təqdim edir.

Kitabın geniş ictimaiyyətə təqdimatı haqqında məlumat yaxın günlərdə açıqlanacaq.

https://brill.com/display/title/72006