Xəzər Universitetinin Nərimanov kampusunda 2025-ci il noyabrın 25-də “Dil faktorlarının yaranmasında folklorun rolu: ortaq ünsiyyət dilinin formalaşması” adlı elmi seminar keçirilib.

Tədbirin təşkilatçısı Xəzər MAFİ-nin koordinatoru, Dos. Aynur Qəzənfərqızı çıxışında folklorun dil inkişafındakı rolundan, ortaq kommunikasiya mühitinin formalaşmasına təsir edən mədəni və dil faktorlarından bəhs edib.

Elmi toplantıda Qazaxıstandan dəvət olunan alimlər də iştirak ediblər. Filologiya üzrə fəlsəfə doktoru, Qazaxıstanın Dövlət Dilinin İnkişafı İnstitutunun direktoru Kapalbek Bizomart Seysenbekuly, filologiya üzrə fəlsəfə doktoru, assosiativ professor və sosiolinqvist Abasilov Aman Madelkhanuly və filologiya üzrə fəlsəfə doktoru, onomastika mütəxəssisi Biyarov Berdibek Nuraldauly seminarda çıxış edərək, türk xalqlarının dil əlaqələri, leksik və fonetik paralellər, həmçinin ortaq dil modelinin formalaşması istiqamətində aparılan müasir tədqiqatların nəticələrindən danışıblar.

Tədbir çərçivəsində dilçilik, linqvistika və folklorşünaslıq sahələrində aktual mövzular müzakirə olunub. Universitet tələbələri və gənc tədqiqatçıların iştirakı ilə interaktiv diskussiya keçirilib, sual-cavab sessiyasında müxtəlif elmi yanaşmalar ətrafında fikir mübadiləsi aparılıb.

Sonda iştirakçılar bu kimi tədbirlərin türk xalqları arasında elmi əməkdaşlığın genişlənməsinə və ortaq humanitar platformanın möhkəmlənməsinə əhəmiyyətli yardım göstərdiyini bildiriblər.

Aydan Əliyeva

Filologiya (Azərbaycan dili və ədəbiyyatı) ixtisası üzrə 2-ci kurs tələbəsi,

Xəzər Universiteti