Xəzər Universitetinin Karyera və Məzunlar Mərkəzinin təşkilatçılığı ilə 2025-ci il noyabrın 25-də “Tərcümə” ixtisası üzrə təhsil alan sonuncu kurs tələbələri üçün Avrasiya Tərcümə Mərkəzinin əməkdaşları tərəfindən “Tərcümə peşəsində karyera planlaması və gələcək perspektivlər” mövzusunda seminar keçirilmişdir. Tədbir Avrasiya Tərcümə Mərkəzinin təcrübəli mütəxəssislərinin iştirakı ilə baş tutmuşdur.

Seminarın açılışında Karyera və Məzunlar Mərkəzinin direktoru Zərifə Əliyeva mərkəzin missiyası, fəaliyyəti və tələbələrin peşəkar inkişafına dəstək məqsədilə həyata keçirilən layihələr barədə qısa məlumat vermişdir. O, tələbələrin əmək bazarına uğurlu inteqrasiyasını təmin etmək üçün təqdim olunan karyera xidmətləri və mövcud imkanlardan söz açmışdır.

Avrasiya Tərcümə Mərkəzinin direktoru Nərmin Hüseynova, koordinatoru Nəzrin Mirzəzadə, tərcüməçisi Ülviyyə Kərimli və mərkəzin təcrübə keçən Sevgi İsmayılova mərkəzin fəaliyyəti, tərcümə sahəsində əmək bazarının dinamikası, ixtisaslaşma istiqamətləri, texnoloji yeniliklər və peşəkar inkişaf yolları haqqında geniş  çıxış etmişlər. Onlar, həmçinin, müasir tendensiyalar, yazılı və şifahi tərcümə üzrə perspektivlər, real layihələr və təcrübə proqramları barədə məlumat vermişlər.

Seminar çərçivəsində təşkil olunan qrup işində tələbələr verilmiş tapşırığı yaradıcı və peşəkar şəkildə yerinə yetirmişlər. Qalib qrup üzvləri arasından seçilən bir tələbəyə isə tam təcrübə proqramında ödənişsiz iştirak etmək və proqramın sonunda sertifikatla təmin olunmaq hüququ verilmişdir.

Tədbir sual-cavab sessiyası ilə davam etmiş, tələbələr təcrübə proqramları, işə qəbul prosesi və tərcüməçi kimi karyera inkişafı ilə bağlı suallarını mütəxəssislərə ünvanlamışlar.