2025-ci il noyabrın 24-də Şanlı Zəfərimizin rəmzi olan Şuşa şəhəri Azərbaycan–Türkiyə Beyin Mərkəzlərinin Birinci Forumuna ev sahibliyi etmişdir. Azərbaycan BMTM və Türkiyə Respublikası Xarici İşlər Nazirliyinin Strateji Araşdırmalar Mərkəzinin (SAM) birgə təşkilatçılığı ilə keçirilən forum iki qardaş ölkənin 15 aparıcı beyin mərkəzinin və akademik institutun nümayəndələrini bir araya gətirmişdir.

Forum çərçivəsində Azərbaycan və Türkiyənin xarici siyasətindəki əsas trendlər, Türk Dövlətləri Təşkilatı (TDT) çərçivəsində inteqrasiya imkanları, eləcə də nəqliyyat-kommunikasiya və enerji tərəfdaşlığının ikitərəfli münasibətlərə təsiri geniş müzakirə mövzusu olub.

Forumda Xəzər Universiteti Tarix və arxeologiya departamentinin müdiri Dos. Telman Nüsrətoğlu məruzəçi kimi çıxış etmişdir. Dos. Telman Nüsrətoğlu çıxışında ortaq tarixi-mədəni narrativlərin formalaşdırılmasının önəminə diqqət çəkərək universitetlər və orta məktəblər üçün vahid konseptual çərçivəyə malik olan ümumi Türk tarix və coğrafiyası, mədəniyyəti, ədəbiyyatı dərsliklərinin hazırlanmasının vacibliyinə toxunub. Departament müdiri, eyni zamanda, iki qardaş xalq arasında tarixi və stratejik mövzuları, mənəvi bağları ön plana çıxaracaq müştərək kino layihələrinin həyata keçirilə bilməsi üçün " Azərbaycan - Türkiyə Film Fondu”nun yaradılmasını, türk mifologiyası və düşüncə tərzini vahid mədəni baza kimi təqdim edən uşaq ədəbiyyatının çap olunmasını, çizgi filmlərinin çəkilməsini, ortaq doktorantura proqramlarının və süni intelekt üzrə tədqiqat mərkəzlərinin yaradılmasını,  müştərək milli  kriptoqrafiya sistemlərinin hazırlanmasını  təklif edib.