Türkiyənin Akdeniz Universitetinin müəllimləri - Dr. Seval Apaydın və Prof. Sekine Gülfem 2025-ci il noyabrın 17-21-də Erasmus proqramı çərçivəsində Xəzər Universitetinin  qonağı oldular. Psixologiya departamentinin təşkilatçılığı ilə səfər çərçivəsində həm professor-müəllim heyəti, həm də tələbələr üçün müxtəlif mövzularda bir sıra elmi-praktik seminarlar keçirildi.

“Məktəbdə və ailədə itki və yas”. Noyabrın 18-də baş tutan seminarda bu mövzu müzakirə olundu. Tədbirdə Psixologiya departamentinin əməkdaşları, fakültə müəllimləri və bakalavr tələbələri iştirak etdilər. Uşaqların ailədaxili və məktəb mühitində yaşadıqları itkilərin emosional və sosial inkişaflarına təsiri, müəllim - şagird münasibətlərində meydana çıxan dəyişikliklər, mövzunun psixoloji tədqiqat obyekti kimi əhəmiyyəti elmi-praktik müzakirələr çərçivəsində təhlil edildi. Bu seminar iştirakçılar üçün həm nəzəri biliklərin, həm də tətbiqi yanaşmaların paylaşılması baxımından dəyərli platforma rolunu oynadı.

“Məktəblərdə Adler əsaslı tətbiqlər. Sinifdə pozitiv disiplin necə qurulur?” Noyabrın 20-də Dr. Seval Apaydın və Prof. Sekine Gülfem universitetin Nərimanov korpusunda müəllimlik ixtisasında təhsil alan tələbələr üçün bu mövzuda növbəti seminar keçirdilər. Tələbələr seminarda pozitiv disiplinin əsas prinsipləri, sinifdə mənfi davranışların idarə olunması, Adler yanaşmasının praktik tətbiqi üzrə interaktiv çalışmalar yerinə yetirdilər. Tədbir tələbələrin böyük marağına səbəb oldu.

Magistr tələbələri üçün “Pozitiv Valideynlik təlimi”. Noyabrın 20-də qonaq professorlar Psixologiya departamentinin təşkilatçılığı ilə klinik və ümumi psixologiya magistr tələbələri üçün xüsusi təlim proqramı həyata keçirdilər. Təlim psixoloq Mələk Kərimovanın tədris etdiyi “Ailə Psixologiyası” fənninin mövzularından biri olan “Pozitiv valideynlik təlimi” çərçivəsində keçirildi. Təlim zamanı tələbələr müasir pozitiv valideynlik modelləri, uşaq - valideyn münasibətlərində konstruktiv yanaşmalar, davranışın tənzimlənməsi və emosional dəstək metodları üzrə həm nəzəri bilik, həm də praktiki bacarıqlar əldə etdilər.

Erasmus proqramı çərçivəsində keçirilən bu tədbirlər Psixologiya departamentinin beynəlxalq əməkdaşlıq sahəsində fəaliyyətinin genişləndiyini göstərməklə yanaşı, tələbələrə və müəllimlərə mühüm elmi-praktik imkanlar yaratdı. 

Sonda Psixologiya departamentinin koordinatoru, psixoloq Mələk Kərimova qonaq müəllimlərə təşəkkür edərək, onların Xəzər Universitetində fəaliyyətindən məmnunluğunu bildirdi.