Xəzər Universitetinin Humanitar, təhsil və sosial elmlər fakültəsinin Tarix-coğrafiya müəllimliyi ixtisası üzrə təhsil alan tələbələri 2025-ci il noyabrın 19-da AMEA Arxeologiya və Antropologiya İnstitutunun Muzey-sərgi zalında ekskurs-dərsdə iştirak ediblər. Ekskurs-dərs Tarix və arxeologiya departamentinin müəllimi, institutun Elmi Ekspozisiyanın Təşkili şöbəsinin müdiri Orxan Zamanovun rəhbərliyi ilə təşkil olunub.

Tələbələrə əvvəlcə Azərbaycanın arxeoloji irsinin əsas mərhələləri, son illərdə aparılan elmi tədqiqatların nəticələri və ekspozisiyada sərgilənən materialların elmi-tarixi əhəmiyyəti barədə məlumat verilib. Sonra zala daxil olan qruplar müxtəlif arxeoloji dövrlərə aid artefaktlar, məişət və təsərrüfat əşyaları, əmək alətləri və saxsı qablar üzərində əyani müşahidələr aparıblar. Ekskursiya zamanı tələbələrin dərs prosesinə inteqrasiya məqsədilə interaktiv sual-cavab və tədris yönümlü kiçik tapşırıqlar da təqdim olunub.

Muzey-Sərgi zalında keçirilən bu dərs, tələbələr üçün həm arxeoloji materiallarla canlı təmas imkanı, həm də gələcək peşə fəaliyyətlərində tətbiq edə biləcəkləri praktiki bacarıqların inkişafı baxımından əhəmiyyətli olub.