2025-ci il noyabrın 13-də Xəzər Universitetinin Karyera və Məzunlar Mərkəzinin direktoru Zərifə Əliyeva, Mərkəzin məzunlarla iş üzrə koordinatoru Aysel Hüseynli, eləcə də İqtisadiyyat və menecment departamentinin tədqiqatçı müəllimi Ülkər İbadlı “PepsiCo” şirkətində keçirilən işgüzar görüşdə iştirak ediblər.

Görüş “PepsiCo” şirkətinin nümayəndələri – İnsan resursları üzrə baş koordinator Nərminə Paşayeva, Qafqaz İnsan resursları üzrə Biznes partnyoru Natia Ubilava və Qafqaz üzrə İstedadlıların seçimi meneceri Liana Satseradze`nin iştirakı ilə baş tutub.

Tərəflər görüş zamanı qarşılıqlı əməkdaşlıq perspektivlərini, Xəzər Universiteti məzunlarının əmək bazarına hazırlıq səviyyəsini, tələbə və məzunlar üçün təcrübə və karyera imkanlarını, həmçinin əmək bazarının aktual tələblərini müzakirə ediblər.

Söhbət zamanı universitet – sənaye əməkdaşlığının gücləndirilməsinin vacibliyi xüsusi vurğulanıb. Zərifə Əliyeva tələbələrin real iş mühitinə inteqrasiyasını dəstəkləyəcək birgə təşəbbüslərin əhəmiyyətini qeyd edib. “PepsiCo” nümayəndələri isə şirkətin gənclərin karyera inkişafına yönəlmiş layihələri barədə ətraflı məlumat vermişlər.

Görüş tərəflər arasında gələcək əməkdaşlığın daha da genişləndirilməsi niyyəti ilə səmərəli şəkildə yekunlaşıb.