Xəzər Universitetinin Mövlana Ədəbi-Fəlsəfi Araşdırmalar İnstitutunun (MƏFAİ) koordinatoru Dr. Fəridə Seyidova və Dillər və ədəbiyyatlar departamentinin müəllimi Dos. Xatirə Yusifova Hindistanın Qauhati Universiteti tərəfindən ənənəvi olaraq sufi araşdırmaları mövzusunda təşkil edilən “Sufizm və dinlərarası dialoq” adlı beynəlxalq konfransda iştirak  ediblər.

Beynəlxalq konfrans 2025-ci il noyabrın 9-12-də adı çəkilən universitetin Fars dili və  ədəbiyyatı departamentinin təşkilatçılığı ilə keçirilib. elmi tədbir üç gün davam edib və müxtəlif sessiyalarda Özbəkistan, Rusiya, Tacikistan, Macarıstan, Banqladeş, Azərbaycan, İsveçrə, İran, həmçinin Hindistanın müxtəlif universitetlərindən olan mütəxəssislərin məruzələri dinlənilib.

Konfransda Mövlana Ədəbi-Fəlsəfi Araşdırmalar İnstitutunun koordinatoru Fəridə Seyidova Hindistanla Azərbaycan arasında təsəvvüf körpüsünün nümayəndələrindən sayılan Yaqub xan Kaşğari haqqında “Azərbaycan mənşəli Xəlvətiyyə sufi təriqətinin Şəbaniyyə qolunun Hindistandakı nümayəndəsi: Yaqub Xan Kaşğari” (Representatıve of the Shabanıyyah Branch of the Khalwatı Sufı Order of Azerbaıjanı Orıgın in Indıa: Yaqub Khan Kashgarı), Dillər və Ədəbiyyatlar Departamentinin əməkdaşı dos.Xatirə Yusifova isə “Mövlanə düşüncəsində nəfs anlayışı və ilahi varlığa mənəvi yüksəliş” (“The concept of ego in Mevlânâ Rumi’s thought and the spiritual ascent to the divine being”) mövzularında məruzə  ediblər. Onların ingiliscə təqdim etdiyi məruzələr konfrans iştirakçıları tərəfindən maraqla qarşılanıb, verilən suallar cavablandırılıb.