Neftçala rayon Heydər Əliyev Mərkəzində Heydər Əliyev Fondunun dəstəyi və “Regional İnkişaf” İctimai Birliyinin təşikatçılığı, Pekin Xarici Dillər Universitetinin Azərbaycan dili kafedrasının müdiri, filologiya üzrə fəlsəfə doktoru Aqşin Əliyev və AMEA-nın Nəsimi adına Dilçilik İnstitutunun aparıcı elmi işçisi, dosent Qüdsiyyə Qəmbərovanın təşəbbüsü ilə 2025-ci il noyabrın 15-də “AZLİNQ 2025 - Azərbaycan dili və müasir dilçilik: problemlər, perspektivlər və çağırışlar” adlı beynəlxalq elmi konfrans keçirilib. Konfransda Xəzər Universitetinin rektoru Dr.Raziyə İsayeva, Dillər və ədəbiyyatlar departamentinin əməkdaşları, çinli tələbələri iştirak ediblər.

Konfransın açılış mərasimində çıxış edən Dr. Raziyə İsayeva müstəqillik dövründə Azərbaycan dilinin inkişafına göstərilən xüsusi diqqət və qayğıdan, son dövrlər Azərbaycan dilinin saflığının qorunması ilə bağlı görülən işlərdən, Xəzər Universiteti alimlərinin ana dilimizin qorunması və inkişafı istiqamətində gördüyü əsas işlərdən danışıb, keçirilən elmi tədbirin əhəmiyyətini yüksək qiymətləndirib, konfransın işinə uğurlar arzulayıb.

Konfrans öz işini bölmə iclasları ilə davam etdirib. Bölmə iclaslarından birinə Xəzər Universitetinin müəllimi, konfransın elmi heyətinin üzvü Pərvin Eyvazov moderatorluq edib.

Konfransda Xəzər Universitetinin Dillər və ədəbiyyatlar departamentinin əməkdaşları – Reyhan Mədətova “XIII-XVIII əsrlər Azərbaycan dili yazılı abidələrində məsdərin qrafik-fonetik xüsusiyyətlərinin dialekt və şivələrimizdə qalıqları”, Almaz Bədəlova “Qərbi Azərbaycan şivələrində işlənən köməkçi nitq hissələri” və Pərvin Eyvazov “Azərbaycan ədəbi dili tarixinin Bəkir Çobanzadə tərəfindən dövrləşdirilməsi” adlı məruzələrlə çıxış ediblər.  

Konfransın sonunda Xəzər Universiteti təmsilçiləri sertifikatla təltif olunublar.